Ինչ ճակատագիր են ունենալու Արցախի փողոցի 10 հասցեի վթարային շենքի 75 ընտանիքները: Նման հարցադրումով Երեւանի քաղաքապետ Տարոն Մարգարյանին է դիմել Երեւանի ավագանու «Բարեւ Երեւան» խմբակցության անդամ Անահիտ Բախշյանը:

Նրա նամակում, մասնավորապես, ասվում է. «Հետք»-ի կայքում 16.01.2017թ. մի հոդված է դրված Արցախի փողոցի 10-րդ վթարային շենքի մասին, հրապարակել են նաեւ շենքի անմարդկային պայմանները ցուցադրող լուսանկարներ: Հոդվածում ասվում է. ««Դուք եկել եք կորած կղզիներ, մեր մասին ֆիլմ էլ են նկարել»,- ասում են Արցախի 4-րդ նրբանցքի 10-րդ շենքի բնակիչները (տարածքը հայտնի է որպես ՏԷՑ-ի հանրակացարան): 1958-ին կառուցված հանրակացարանի շենքում այսօր բնակվում է մոտ 75 ընտանիք (շուրջ 250 բնակիչ), որոնցից 13-ը փախստականներ են: Շենքը 4-րդ կարգի վթարային է: Մեկ տարվա ընթացքում քարերը սկսել են ինտենսիվ ձեւով թափվել, անձրեւաջրերը լցվում են սենյակներ, խոնավությունից էլեկտրական հոսանքը վտանգավոր է դառնում: Հանրակացարանի բնակիչները տանն ինչքան թաս, տարա ունեն, շարել են սենյակներում»:

Այսօր այս մասին նամակով դիմեցի քաղաքապետ Տարոն Մարգարյանին՝ գրելով. «Ինչպես բնակիչներն են ասում, բազմաթիվ անգամ դիմել են քաղաքապետարան, սակայն խնդրին ոչ մի լուծում չի տրվել: Խնդրում եմ պարզաբանել, թե ինչ ճակատագիր են ունենալու այդ վթարային շենքն ու այնտեղ ապրող 75 ընտանիքները: Քաղաքապետարանի համապատասխան պաշտոնյաներն ինչո՞ւ բնակիչների համար կենսական այս խնդիրը պատշաճ կերպով չեն քննարկում իրենց հետ ու չեն ասում, թե ինչ է սպասվում նրանց: Ինչո՞ւ են այս մարդիկ անտեսված քաղաքապետարանի կողմից»: