Oxfam ընկերության տվյալներով՝ աշխարհում 8 միլիարդատեր ավելի շատ հարստություն ունեն, քան մոլորակի 3.6 մլրդ ամենաանապահով մարդիկ։ Իսկ ամենահարուստ մարդկանց 1 տոկոսը տնօրինում է համաշխարհային կարողության 50.8 տոկոսը, հայտնում է DW–ն։
Մոլորակի ամենահարուստ 8 միլիարդատերերն ունեն 400 մլրդ եվրո, իսկ 3.6 մլրդ ամենաանապահով մարդիկ միասին ունեն 384 մլրդ եվրո։ Այս մասին ասված է հունվարի 16-ին հրապարակված Oxfam ընկերության զեկույցում։
«Աշխարհում աղքատության տարածման մասին նոր ճշտված տեղեկությունները վկայում են, որ մարդկության ամենաքիչ ապահովված կեսն ավելի քիչ ունեցվածք ունի, քան ենթադրվում էր»,– ասված է զեկույցում։
Անցյալ տարի կազմակերպության հաշվարկները վկայում էին, որ 62 միլիարդատերեր ունեն այնքան կարողություն, որքան ամենաաղքատ 3.6 մլրդ մարդիկ։