Ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանին այսօր՝ հունվարի 16–ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանը մեղավոր ճանաչեց եւ դատապարտեց 2 տարի ազատազրկման:
Գեւորգ Սաֆարյանի համար դատավճիռն անակնկալ չէր, նա ասաց` «Այդպես էլ պետք է լիներ»։
Նշենք, որ նիստին ներկա էր նաեւ «Ժառանգություն» կուսակցության նախագահ Րաֆֆի Հովհաննիսյանը, որը դատարանի վճռից հետո իր շարֆը նետեց Գեւորգ Սաֆարյանի ուղղությամբ` այդպիսով իր զորակցությունը նրան հայտնելով: Նիստից հետո լրագրողների հետ զրույցում Րաֆֆի Հովհաննիսյանը դատարանի վճիռը որակեց հակաքաղաքացիական, քրեական ու հակաօրինական:
Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին: Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ:
