Խաբարովսկում առեւանգված, այնուհետեւ խեղդամահ անելուց հետո այրված 25-ամյա Անդրեյ Մուրադյանը Ջավախքի Ծալկա քաղաքից էր: Անդրեյ Մուրադյանն իր ընտանիքի հետ արդեն երկար տարիներ ապրում էր Խաբարովսկում: Նրա ավագ եղբայրը` Ալեքսանդրը, մի քանի տարի առաջ մահացել էր:
«Ծնողների միակ հույսն էր, տան միակ ճրագը, դա էլ մարեցին: Անցած տարի ուզում էր ամուսնանալ, երեխաներ ունենալ, որ ծնողներին ուրախացներ, բայց փոշմանեց, չամուսնացավ»,-NEWS.am-ի հետ զրույցում պատմեց Անդրեյի ընկերներից մեկը:
Անդրեյ Մուրադյանի հայրը Ռուսաստանում հայտնի գործարար է:
Անդրեյ Մուրադյանի սպանության դեպքով հարուցվել է քրեական գործ՝ «Սպանություն» եւ «Մարդու առեւանգում» հոդվածներով:
Պարզվել է, որ հունվարի 10-ին Անդրեյ Մուրադյանին առեւանգել էր նրա ծանոթը` Երկաթուղային թաղամասի ավտոտնակային կոոպերատիվից: Հանցագործները նրան մի քանի օր պատանդ են պահել՝ նրա ազատման համար պահանջելով 20 միլիոն ռուբլի փրկագին: Ավելի ուշ, վախենալով պատժից, սպանել են նրան՝ խեղդելով պարանով, այնուհետեւ այրել: Գործով անցնում են Խաբարովսկի երկու բնակիչ՝ 25 եւ 26 տարեկան: Նախնական տվյալներով, Մուրադյանին խեղդամահ անելու եւ հրկիզելու կասկածանքով ձերբակալվածներից մեկն ադրբեջանցի է: