Ադրբեջանի քաղաքացիական հասարակության, լրատվամիջոցների տասնյակ ներկայացուցիչներ, իրավաբաններ եւ քաղաքացիական ակտիվիստներ ԵԽԽՎ-ի հունվարյան նստաշրջանի նախաշեմին կառույցի անդամներին նամակ են ուղղել՝ պահանջելով գնահատական տալ կազմակերպությունում կոռուպցիայի փաստերին:
Ըստ contact.az-ի՝ խոսքը, մասնավորապես, ԵԽԽՎ փոխնախագահ Լուկա Վոլոնտեի մասին է, որին Միլանի դատախազությունը մեղադրում է ադրբեջանցի պատգամավորներ Էլհան Սուլեյմանովից եւ Մուսլիմ Մամեդովից 2.39 մլն եվրոյի չափով կաշառք ստանալու մեջ՝ 2013 թվականին Ադրբեջանում քաղբանտարկյալների մասին բանաձեւի ընդունման ջանքերը խափանելու դիմաց:
«ԵԽԽՎ-ն պետք է անհապաղ վերականգնի Ադրբեջանում քաղբանտարկյալների հարցով հատուկ զեկուցողի մանդատը, Եվրախորհրդի փորձագետների հետ համատեղ նոր մանրակրկիտ զեկույց պատրաստի երկրում մարդու իրավունքների խախտումների մասին»,- ասված է նամակում: