Ռուսաստանի հետ հարաբերություններում Եվրամիությունը նախկինի պես առաջնորդվում է արատավոր եւ անհեռանկարային տրամաբանությամբ՝ բոլոր գործընկերներին ստիպելով ընտրություն կատարել Մոսկվայի եւ Բրյուսելի միջեւ: ՏԱՍՍ-ի փոխանցմամբ՝ այս մասին մամուլի ասուլիսում հայտարարել է ՌԴ ԱԳ նախարար Սերգեյ Լավրովը:
«Եվրամիության դիվանագիտության ղեկավար Ֆեդերիկա Մոգերինիի խորհրդական Նատալի Տոչչին ասել է, որ Ռուսաստանի հետ Սերբիայի հարաբերությունները գլխավոր մարտահրավերն են Սերբիայի համար ԵՄ արտաքին քաղաքականությանը համապատասխանելու տեսանկյունից: Դա ցույց է տալիս, որ վերջին 12 եւ ավելի տարիներին ոչինչ չի փոխվել, երբ Եվրոպայում ցանկացած գործընկեր Բրյուսելի կողմից քննարկվում էր՝ ելնելով Եվրոպայի կամ Ռուսաստանի միջեւ ընտրություն կատարելու հանգամանքից: Դա արատավոր, անհեռանկարային տրամաբանություն է, որը, ցավոք, գերակշռում է մինչ օրս»,- ասել է Լավրովը: