«Մոնակոյի սիրտը հայ մանուկների համար» բարեգործական կազմակերպության, «Մոնակոյի հումանիտար խմբի» եւ «Մոնակոյի Կարմիր խաչի» համագործակցությամբ սկիզբ առած նախաձեռնության շրջանակներում2016թ. տարեվերջին Մոնակոյի սրտաբանական կենտրոնում տեղի է ունեցել առաջին հայ մանկան սրտի վիրահատությունը:
Հայաստանի ԱԳՆ-ից NEWS.am-ին հայտնում են, որ այն մեծ հաջողությամբ կատարել են դոկտոր Օլիվիե Ռայսկին եւ դոկտոր Ֆրանսուա Բուրլոնը:
Ծրագրի իրականացմանն աջակցություն են ցուցաբերել նաեւ Մոնակոյի իշխանությունները, Ֆրանսիայում ՀՀ դեսպանությունը եւ Մարսելում ՀՀ գլխավոր հյուպատոսությունը:
«Մոնակոյի սիրտը հայ մանուկների համար» բարեգործական կազմակերպությունը հիմնադրվել է 2015թ. հուլիսին` Սրտի եւ կրծքավանդակի վիրահատության Մոնակոյի կենտրոնի վիրաբույժ, հայ պրոֆեսոր Արման Էկերի նախաձեռնությամբ: Կազմակերպության պատվո նախագահն է Մոնակոյի արքայազն Ալբերտ II-ը, իսկ պատվավոր հովանավորը` ծագումով հայ երգչուհի Էլեն Սեգարան:
Նշենք, որ հայազգի հայտնի վիրաբույժ Արման Էկերը 2015թ. սեպտեմբերին այցելել է Հայաստան, որի շրջանակներում հանդիպում էր ունեցել ՀՀ Սփյուռքի նախարար Հրանուշ Հակոբյանի հետ եւ ներկայացրել իր կազմակերպության գործունեությունը:
Կազմակերպության նպատակն է Հայաստանի խիստ անապահով ընտանիքների` սրտի բարդ պաթոլոգիաներով հիվանդ երեխաների բուժման կազմակերպումը Մոնակոյի սրտաբանական կենտրոնում, որոնց վիրահատական բուժումը հնարավոր չէ կազմակերպել Հայաստանում: Երեխաների փոխադրումն իրականացնում է «Ավիացիա առանց սահմանների» բարեգործական կազմակերպությունը, որից հետո նախավիրահատական եւ հետվիրահատական ապաքինման շրջանը վիրահատության մեկնած երեխան անցկացնում է նախապես ընտրված հյուրընկալող ընտանիքում:
Կազմակերպությունը նախատեսում է իրականացնել տարեկան մինչեւ 10 երեխայի բուժում: