Նորվեգիայի պետական պաշտպանությունը անհիմն է համարել ահաբեկչության համար դատապարտված Անդերս Բերինգ Բրեյվիկի բողոքը իր բանտային պայմանների անմարդկային լինելու մասին: Դատաքննությունը սկսվել է անցյալ շաբաթ եւ շարունակվել երեքշաբթի, հայտնում է NRKը:
Պետության դեմ Բրեյվիկի բողոքը արդեն երկրորդ անգամ է քննարկվում, այս անգամ այն վերաքննիչ դատարանն է քննում: Անցյալ տարվա գարնանը ահաբեկչի հայցը քննել էր Օսլոյի շրջանային դատարանը, որը ճանաչել էր բանտում Բրեյվիկի իրավունքների մասնակի խախտումը՝ Մարդու իրավունքների եվրոպական կոնվենցիայի 3-րդ հոդվածի կետերով, որի համաձայն ոչ մեկը չպետք է ենթարկվի խոշտանգման կամ անմարդկային վերաբերմունքի, արժանապատվությունը նվաստացնող վերաբերմունքի կամ պատժի:
Պետության պաշտպաններից Մարիուս Էմբերլանդը երեքշաբթի ասել է. «Պատժի կրումն ինքնին նվաստացուցիչ է եւ անհարմարություններ է ենթադրում: Սրանում է ամբողջ էությունը: Սակայն դա չի խախտում ՄԻ Եվրոպական կոնվենցիայի 3-րդ հոդվածը»:
Մեկ այլ պաշտպան կարծում է, որ դատապարտյալը շարունակում է հանրության համար վտանգ ներկայացնել, եւ որ բանտային տարիներին նա փորձել է շփումներ հաստատել ծայրահեղականներից ոմանց հետ: Նա հիշեցրել է 2014 թվականի մայիսին Բրեյվիկի նամակն ուղղված ԱՄՆ-ի «Արիական եղբայրության» առաջնորդներից Թոմաս Սիլվերսթային, որը դատապարտված է բանտում մի քանի մարդկանց, այդ թվում՝ բանտային հսկիչի սպանության համար: Նրա խոսքով՝ Բրեյվիկը 2012 թվականին դադարեցրել է մոր հետ տեսակցությունները, քանի որ նա քննդատում էր նրա իրականացրած ահաբեկչությունները:
Վերաքննիչ դատարանի նիստն ընթանում է Շիեն բանտում, որտեղ Բրեյվիկը կրում է իր պատիժը: Քննարկվում է միաժամանակ 2 բողոքարկում՝ ինչպես պետության, այնպես էլ Բրեյվիկի: Դատաքննությունն սկսվել է հունվարի 10-ին:
