Վճռաբեկ դատարանը մերժել է 47–ամյա որդու սպանության համար 13 տարվա ազատազրկման դատապարտված 75-ամյա Կարապետ Ոսկանյանի շահերի պաշտպանի բողոքի վարույթ ընդունումը: Փաստաբանը նաեւ հունիսի 7-ին բաց թողնված ժամկետը հարգելի համարելու եւ վերականգնելու միջնորդություն էր ներկայացրել առաջին ատյանի դատարան, որը առաջին ատյանի դատարանը մերժել էր: Վահե Մակյանն այնուհետեւ դիմել էր Վերաքննիչ դատարան:
Պաշտպանի վերաքննիչ բողոքի քննության արդյունքում ՀՀ վերաքննիչ քրեական դատարանը 2016 թվականի հուլիսի 27-ին որոշում է կայացրել բողոքը մերժելու, Երևանի Շենգավիթ վարչական շրջանի ընդհանուր իրավասության առաջին ատյանի դատարանի 2016 թվականի մայիսի 19-ի որոշումը՝ օրինական ուժի մեջ թողնելու մասին։
Հիշեցնենք, որ Կարապետ Ոսկանյանը մեղավոր է ճանաչվել եւ դատապարտել է 13 տարվա ազատազրկման:
Կարապետ Ոսկանյանին մեղադրանք է առաջադրվել այն բանի համար, որ նա 2015թ. հունվարի 25-ին` ժամը 17:00-ի սահմանում, իրեն պատկանող ավտոտնակում տանիքը վերանորոգելու հարցի շուրջ վիճաբանել է որդու` Գերման Ոսկանյանի հետ, որի ընթացքում նրան ապօրինաբար կյանքից զրկելու դիտավորությամբ, ավտոտնակից վերցնելով կացինը` դրա սուր եւ բութ հատվածներով բազմակի հարվածներ է հասցրել Գերման Ոսկանյանի գլխին եւ գանգուղեղային բազմակի բաց բութ եւ կոտրած վնասվածքներ պատճառելով` սպանել է նրան:
Կարապետ Ոսկանյանին մեղադրանք է առաջադրվել ՔՕ-ի 104 հոդվածի 1 մասով` սպանությունը՝ ապօրինաբար մեկ ուրիշին դիտավորությամբ կյանքից զրկելը, որը պատժվում է ազատազրկմամբ՝ վեցից տասներկու տարի ժամկետով: