«Բարգավաճ Հայաստան» կուսակցության նախկին առաջնորդ Գագիկ Ծառուկյանի վերադարձը քաղաքականություն Հանրապետական կուսակցությանը չի շեղի իր քաղաքական ծրագրերից: Այս մասին NEWS.am-ի հետ զրույցում ասաց Ազգային ժողովի փոխնախագահ, ՀՀԿ մամուլի քարտուղար Էդուարդ Շարմազանովը:
Նա հիշեցրեց, որ Գագիկ Ծառուկյանի վերադարձի կապակցությամբ մեջբերել է հին հույն փիլիսոփա Հերակլիտին եւ ասել, որ ամեն ինչ հոսում է, ամեն ինչ փոփոխվում: «Քաղաքական նոր իրավիճակ է ստեղծվել: Կայնքում շատ փոփոխություններ են լինում: Հանրապետական կուսակցությունն իր օրակարգն ունի, կուսակցությունը կառաջնորդվի իր քաղաքական ծրագրով, եւ ապրիլի 2-ին մրցակցության պայմաններում ժողովուրդը կորոշի՝ իր ձայնն ում տալ: Անկախ Ծառուկյանի, Օհանյանի, Օսկանյանի, Փաշինյանի, Միքայելյանի, Մարուքյանի, Քոքոբելյանի, Բագրատյանի եւ մյուս ընդդիմադիր գործիչների նախընտրական քարոզչությունից եւ քաղաքական ծրագրերից, ՀՀԿ-ն իր առաջնայնություններն ունի, իր օրակարգը»,- ընդգծեց Էդուարդ Շարմազանովը:
Ի պատասխան հարցին՝ Ծառուկյանի վերադարձը համաձայնեցվա՞ծ է իշխող կուսակցության հետ, ՀՀԿ-ի մամուլի քարտուղարը նշեց. «Մենք մյուս քաղաքական գործիչների եւ թիմերի, այդ թվում՝ Գագիկ Ծառուկյանի քաղաքական ծրագրերը չենք մշակել, չենք մշակում եւ չենք մշակի: Դա մեր քաղաքական ընդդիմախոսների խնդիրն է»:
Հիշեցնենք, որ «Բարգավաճ Հայաստան» կուսակցության նախկին առաջնորդ, օլիգարխ Գագիկ Ծառուկյանը որոշել է ակտիվ քաղաքականություն վերադառնալ եւ առաջադրվել ապրիլի 2-ին անցկացվող խորհրդարանական ընտրություններում: «Ես կմասնակցեմ 2017-ի խորհրդարանական ընտրություններին եւ լայն դաշինք կձեւավորեմ: Մեր դռները բաց են բոլոր այն ուժերի եւ գործիչների համար, որոնք երկրի ապագայով մտահոգ են»,- մասնավորապես հայտարարել է Ծառուկյանը: Նա ստիպված էր քաղաքական գործունեությունը դադարեցնելու մասին հայտարարել 2015-ի փետրվարին նախագահ Սերժ Սարգսյանի կտրուկ քննադատությունից հետո: