Երեւանում մարտի 14-ի երեկոյան անչափահասի սպանության գործով երեք երիտասարդ, որոնք նախաքննության ընթացքում քրեական գործում ներգրավվել են որպես տուժող, դատարանի որոշմամբ, այսուհետ վկայի կարգավիճակով հանդես կգան: Այս մասին NEWS.am-ը տեղեկացավ ամբաստանյալներ Դավիթ եւ Նարեկ Պետրոսյանների հարազատներից: Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանի որոշմամբ քրեական գործով տուժողներ ճանաչված Սամվել Գասպարյանը, Ժոռա Ավետիսյանը եւ Լեւոն Բաղդասարյանը գործում ներգրավվել են որպես վկաներ: Դատարանը որպես տուժող դատարան ներկայացած Ժոռա Ավետիսյանին հեռացրել է դատական նիստերի դահլիճից:
Նարեկ եւ Դավիթ Պետրոսյաններին մեղադրանք է առաջադրվել այն բանի համար, որ նրանք 2016թ. մարտի 13-ին` ժամը 21-ի սահմանում Երեւան քաղաքի Սարի Թաղի 5-րդ փողոցի 67 հասցեում գործող թիվ 47 դպրոցի մոտ վիճաբանության, ապա ծեծկռտուքի ժամանակ իրենց հետ նախապես վերցված «Թիթեռ» տեսակի դանակով կյանքից ապօրինի զրկելու դիտավորությամբ հարվածել են անչափահաս Ա. Բաղդասարյանի սրտին, ինչի հետեւանքով կարճ ժամանակ անց նա մահացել է: Բացի այդ դանակով դիտավորությամբ հարվածներ են հասցրել անչափահաս Սերգեյ Օսիպովին` նրա առողջությանը պատճառել միջին ծանրության վնաս` առողջության տեւական քայքայումով:
Նրանց մեղադրանք է առաջադրվել ՀՀ ՔՕ 3 հոդվածներով՝ 104-րդ հոդվածի 1-ին մասով (սպանություն), 34-104-րդ հոդվածի 2-րդ մասի 1-ին կետով (սպանության փորձ՝ երկու կամ ավելի անձանց նկատմամբ), 113-րդ հոդվածի 2-րդ մասի 1-ին կետով (2 կամ ավելի անձանց միջին ծանրության մարմնական վնաս պատճառելը):