Ես դրական եմ վերաբերում քաղաքական ուժերի ու գործիչների, այդ թվում՝ Գագիկ Ծառուկյանի ու ԲՀԿ-ի մտադրություններին մասնակցելու 2017 թվականի խորհրդարանական ընտրություններին։ Այս մասին հայտարարություն է տարածել ՀՀԿ փոխնախագահ Արմեն Աշոտյանը:
Հայտարարությունում նաեւ ասվում է.
«Նախաձեռնելով սահմանադրական բարեփոխումները` մենք ստեղծեցինք բոլոր հիմքերը Հայաստանի քաղաքական համակարգը դարձնելու առավել բաց եւ առավել ճկուն։ Այժմ քաղաքական համակարգը կբարեփոխվի եւ կբարելավվի առաջին հերթին քաղաքական միավորումների մրցակցության շնորհիվ: Այս տեսանկյունից գալիք ընտրությունները կարեւորագույն նշանակություն ունեն մեր կողմից առաջ քաշված զարգացման ուղեգծի իրականացման համար։ Հետեւաբար, յուրաքանչյուր քաղաքական թիմ, որ ասելիք ունի ժողովրդին եւ կարող է պատշաճ ներկայանալ տրամաբանված ծրագրով, իրավունք ունի փորձել իր ուժերը գալիք ընտրություններում, եւ դա ողջունելի է:
Գագիկ Ծառուկյանի հայտարարությունը ընտրություններին մասնակցելու հայտ էր, եւ այն կարող է օգուտ բերել քաղաքական մրցակցությանը՝ անկախ այն բանից, որքանով ենք մենք համաձայն հայտարարության մեջ տեղ գտած դիտարկումների հետ, անկախ այն բանից, որքանով են իրենք համաձայն մեր հստակ դիտարկումների հետ:
Կարծում եմ՝ սպասվում է հետաքրքիր մրցապայքար»:
Հիշեցնենք, որ երկու 2015 թվականի փետրվարին Արմեն Աշոտյանը Գագիկ Ծառուկյանի մասին նշել էր հետեւյալը. «Իր նմաններն են այսօր խանգարում իմ երեխաներին դպրոցներում սովորելու, որովհետեւ այդ երեխաները տեսնում են, որ տգետը կարող է հասնել հաջողության: Ասում են.«Խի սովորեմ, որ, հենա` «Դոդի Գագոյի» օրինակն ունեմ»: Մարդը «Ա»-ն «Բ»-ից չի տարբերում: Ո՞վ չգիտի Հայաստանի քաղաքական դաշտում, անգամ Գագիկ Ծառուկյանի թիմակիցները, որ Ծառուկյանը չունի մտավոր համապատասխան պոտենցիալ: Ո՞վ չգիտի, որ Ծառուկյանը չի կարող ընթերցել անգամ այն տեքստերը, որը իր համար պատրատում են, ո՞վ չգիտի, որ Գագիկ Ծառուկյանի հետ հնարավոր չէ քաղաքական բանավեճի կամ քաղաքական երկխոսության բռնվել»:
