Ապօրինի զենք կրելու մեջ մեղադրվող, «Հիմնադիր խորհրդարանի» անդամ Արմեն Միքայելյանի գործով ընթերակաների մասնակցությամբ տեղի ունեցած խուզարկությունն ու արձանագրությունը կատարվել են կոպիտ խախտումներով: Այսօր՝ հունվարի 18-ին, դատական նիստից հետո լրագրողներին ասաց Արմեն Միքայելյանի փաստաբան Երվանդ Վարոսյանը՝ անդրադառնալով գործով ընթերականերից մեկի՝ Հարություն Մովսիսյանի ցուցմունքին:
«Ցուցմունքից պարզ դարձավ, որ եթե նույնիսկ նա է մասնակցել խուզարկությանը, ապա եւ գործողությունը, եւ արձանագրությունը կատարվել են կոպիտ խախտումներով, որովհետեւ վկան դատարանին հայտնեց, որ իր տվյալները առհասարակ ոստիկաններին հայտնել է գործողության ավարտից հետո միայն: Պարզ է դառնում, որ արձանագրությունը սահմանված կարգով չի կազմվել՝ սկսած հենց գործողության սկզբից, որովհետեւ պետք է ի սկզբանե վերցվեր ընթերականների տվյալները, պարզվեր ընթերակաների անձը. նրանք պետք է լինեն գործով չշահագրգռված, չափահաս ՀՀ քաղաքացիներ: Եթե դու չես պարզել անձը, ինչպես կարող ես հասկանալ՝ համապատասխանում են ընթերականների պահանջներին թե ոչ»,- ասաց փաստաբանը՝ նշելով, որ ոչ ոք չի էլ փորձել ճշտել ընթերակաների կենսագրական տվյալները, քանի որ շտապել են հայտնաբերել ինչ-որ կերպ ատրճանակն ու դնել սեղանին:
Նշենք, որ այսօր դատարանում ցուցմունք տված վկան՝ Հարություն Մովսիսյանը, պարզվում է, որ քննչական գործողության ժամանակ այլ կենսագրական տվյալներ է հայտնել: Թե ինչու է սխալ տվյալներ հայտնել, հետեւյալ կերպ մեկնաբանեց. «Ատրճանակը տեսա, բան եղա…»:
Հիշեցնենք, որ Արմեն Միքայելյանը ձերբակալվել էր 2016թ. հուլիսի 27-ին, երբ Երեւանի Խորենացի փողոցում ցույցից հետո ընտանիքով վերադառնալիս էր եղել տուն: Նրան մեղադրանք էր առաջադրվել ՀՀ ՔՕ 235 հոդվածով (ապօրինի զենք, զինամթերք պահել):
20 օր անազատության մեջ մնալուց հետո Արմեն Միքայելյանն ազատ էր արձակվել: