ՀՀ-ում Նիդերլանդների Թագավորության արտակարգ եւ լիազոր դեսպան Յոհաննես Դաուման (նստավայրը` Թբիլիսի) այսօր՝ հունվարի 18-ին, ՀՀ գյուղատնտեսության նախարար Իգնատի Առաքելյանի հետ հանդիպման ժամանակ ներկայացրել է կարկուտի հետեւանքների վերացման մեխանիզմները:
Գյուղնախարարությունից NEWS.am-ին հայտնում են, որ հանդիպման նպատակն էր քննարկել հայ-հոլանդական համատեղ ծրագրերն ու հետագա համագործակցության հեռանկարները:
Բարձր գնահատելով գյուղատնտեսության ոլորտում Հայաստանում առկա ներուժը` դեսպան Յոհաննես Դաուման հայտնել է հոլանդական կողմի պատրաստակամությունն աջակցություն ցուցաբերել այն առավել արդյունավետ իրացնելու գործում: Միեւնույն ժամանակ Հայաստանում ագրարային ոլորտի հետագա զարգացման հարցում դեսպանը հնարավոր է համարել Վերակառուցման եւ զարգացման եվրոպական բանկի (ՎԶԵԲ) ֆինանսական միջոցների ներգրավումը:
Հանդիպմանը դեսպան Դաուման նախարար Իգնատի Առաքելյանին է ներկայացրել առաջարկություններ կարկուտի հետեւանքների վերացման մեխանիզմների վերաբերյալ, որոնք նախարարը խոստացել է ուսումնասիրել:
Անդրադառնալով երկկողմ փոխգործակցության առավել հեռանկարային ուղղություններին` կողմերը հատուկ անդրադարձ են կատարել կարտոֆիլագործության զարգացմանը` այդ համատեքստում հատկապես կարեւորելով կարտոֆիլի պահեստավորման եւ վերամշակման նպատակով ներդրումների իրականացումն ու այս ուղղությամբ համատեղ ծրագրերի նախաձեռնումը: Քննարկվել են նաեւ Հայաստանոմ գյուղատնտեսական տեխնիկայի վերազինմանն առնչվող խնդիրներ: Նախարար Իգնատի Առաքելյանը վստահություն է հայտնել, որ գյուղտեխնիկայի արդիականացումը հիմք կստեղծի ագրարային բնագավառի հետագա զարգացման համար եւ թույլ կտա ոլորտը դարձնել ավելի շահութաբեր:
Կողմերը մտքեր են փոխանակել նաեւ գյուղատնտեսական կենդանիների սնուցման, ինչպես նաեւ երկուստեք հետաքրքրություն ներկայացնող մի շարք այլ հարցերի շուրջ:
