Ադրբեջանի զինված ուժերը դիտավորյալ են գնդակոծել Չինարի գյուղը: Այս մասին հունվարի 18-ին կայացած մամուլի ասուլիսում հայտարարեց Հայաստանի մարդու իրավունքների պաշտպան Արման Թաթոյանը՝ անդրադառնալով անցյալ տարվա դեկտեմբերի 29-ին Հայաստանի եւ Ադրբեջանի սահմանին գրանցված միջադեպին եւ Տավուշի մարզի Չինարի գյուղի գնդակոծությանը:
Ըստ օմբուդսմենի՝ Ադրբեջանի ԶՈՒ-ի կողմից մարդու իրավունքների լուրջ խախտումներ են արձանագրվել: ՀՀ պաշտպանության նախարարության կողմից պաշտոնական հաղորդագրություն ստանալուց հետո Գեղարքունիքի մարզում օմբուդսմենի ներկայացուցիչը դեպքի վայր է մեկնել:
Դեկտեմբերի 29-ին եւ 30-ին փաստահավաք աշխատանքներ են կատարվել: Հանդիպել են Չինարիի ավագանու անդամների հետ, ուսումնասիրել լրատվամիջոցների հրապարակումները: «Հունվարի 3-ի երեկոյան, ինչպես նաեւ հունվարի 8-ի գիշերը գյուղը գնդակոծվել է: Այդ թվում՝ դպրոցի եւ մանկապարտեզի ուղղությամբ»,- հաղորդեց օմբուդսմենը:
«Միջադեպը, որից ամեն ինչ սկսվեց, երեք հայ զինվորականների սպանությունն էր: Դա կատարվել է հայկական ԶՈՒ-ի կողմից հակառակորդի համար սպառնալիքի բացակայության պայմաններում: Գնդակոծության ընթացքում գյուղի բնակիչները ստիպված են եղել թաքնվել ապաստարաններում: Գյուղը գնդակոծվել է այն ժամերին, երբ կարող էր տուժել քաղաքացիական բնակչությունը»,- նշեց օմբուդսմենը: Արման Թաթոյանն ընդգծեց, որ գյուղի շրջանում զորամասեր չկան, ինչով ադրբեջանական կողմը կարող էր «բացատրել» ագրեսիան: Նպատակը քաղաքացիական բնակչությանը վնաս հասցնելն է եղել:
Օմբուդսմենը մանրամասն ներկայացրեց գյուղի եւ Հայաստանի ու Ադրբեջանի զինված ուժերի տեղակայման վայրերի քարտեզը, գնդակոծության հետեւանքով տուժած տների, դպրոցի եւ մանկապարտեզի լուսանկարներ: Ըստ Թաթոյանի՝ հավաքված նյութերը վկայում են դիտավորյալ գնդակոծության մասին:
