Քալիֆորնիայի հայ համայնքի անհատներն ու բիզնեսը կկարողանան հեշտությամբ հաշիվներ բացել Հայաստանում, իսկ ՀՀ քաղաքացիները՝ օգտվել ԱՄՆ բանկային համակարգից: Այս ուղղությամբ կհամագործակցեն «Ամերիաբանկն» ու Gօlden State Bank-ը, որոնք այսօր՝ հունվարի 18-ին, համագործակցության հուշագիր ստորագրեցին:
Այսօր էլ Հայաստանի քաղաքացիներն ու ռեզիդենտ ընկերությունները կարող են հաշիվներ բացել ու ծառայություններ ստանալ ԱՄՆ բանկերում, ինչպես նաեւ հակառակը: Սակայն այժմ «Ամերիաբանկի» հաճախորդների համար այս գործընթացն էապես կպարզեցվի: Նրանք կկարողանան Gօlden State Bank-ում հաշիվներ բացել, ընդ որում՝ առանց ԱՄՆ-ում մշտական հասցե նշելու կամ դուստր ձեռնարկություն բացելու:
Բանկերը պատրաստ են աջակցել նաեւ հաջորդ քայլերում՝ գործընկերներ փնտրելու եւ տեղի շուկաները գնահատելու համար: Այստեղ «Ամերիաբանկի» զարգացման գծով տնօրեն Տիգրան Ջրբաշյանը հիշեցրեց, որ «Ամերիա» ընկերությունների խումբն արդեն հինգ տարի է, ինչ ներկայացուցչություն ունի ԱՄՆ-ում:
«Այդտեղից մենք գուցեեւ չունեցանք այնքան ակտիվություն, որքան կցանկանայինք, բայց միեւնույն է, մեծ աշխատանք ենք կատարել՝ ավելի լավ ծանոթացնելով ամերիկյան գործարար հանրությանը Հայաստանի շուկային: Նույնիսկ եթե սահմանափակվելու լինեինք միայն հայ համայնքով, ապա այսօր, գումարային պահանջարկով, այն աշխարհում մեր ամենախոշոր համայնքն է: Սակայն սիրով սպասում ենք, բնականաբար, նաեւ այլազգի հաճախորդներին», - նշեց Ջրբաշյանը:
«Մենք էլ ենք ուրախ աշխատանք սկսել Հայաստանի ամենից խոշոր ու հարգված բանկերից մեկի հետ: Սա նոր հնարավորություններ է ստեղծում: Հայաստանի քաղաքացիները, «Ամերիաբանկի ուղղորդությամբ կկարողանան ավելի հեշտությամբ գործել Քալիֆորնիայի բանուկ շուկայում: Ներկայում էլ այդպիսի հնարավորություններ կան, բայց բարդ են, եւ մենք հանձնառու պիտի է լինենք այս բարդությունները հարթելու:
Մյուս կողմից, Քալիֆորնիայի բազմամարդ շուկան պիտի հասնի Հայաստան, գումարներ տեղադրելու եւ ինչու չէ, ներդրում անելու համար: Այնտեղ շատերը կան, որ ուզում են ինչ-որ կերպ առնչվել Հայաստանին հետ, բայց անմիջական կապ չունեն: Նման միտումները վստահաբար պիտի քաջալերենք», - նշեց Gօlden State Bank-ի փոխնախագահ Վիգեն Ալեքս Հովսեփյանը:
Այս կապակցությամբ Ջրբաշյանը նշեց, որ Հայաստանի ավանդների տոկոսադրույքներն ավելի բարձր են, քան ԱՄՆ-ում, ինչը ամերիկացի թե՛ գործարարներին, թե՛ անհատներին կարող է հուշել խնայողությունների առնվազն մի մասը պահել այստեղ:
«Կառաջարկենք, իհարկե, շատ այլ բանկային ծառայություններ՝ բանկային քարտեր, դրամական փոխանցումներ: Օրինակ, մեզ մոտ արդեն գործում է ԱՄՆ-ից արագ դրամական փոխանցումների համակարգը: Հասանելի կլինեն նաեւ ծառայություններ՝ նախատեսված անշարժ գույքի ձեռքբերման համար», - նշեց Ջրբաշյանը:
Հիշեցնենք, «Ամերիաբանկն» առաջին բանկն է Հայաստանում, որի ակտիվները գերազանցել են 1 մլրդ դոլարը: