Տարածված անիմացիոն հոլովակի ամբողջ նպատակը ընտրական գործընթացի ամբողջական կարգի ներկայացումն է, այլ ոչ թե առաջիկա խորհրդարանական ընտրությունների առանձին դրվագների: Այս մասին NEWS.am-ին ասաց Կենտրոնական ընտրական հանձնաժողովի նախագահ Տիգրան Մուկուչյանը:
Նշենք, որ շատ փորձագետների կարծիքով՝ քաղաքացիների համար պատրաստված անիմացիոն հոլովակից սխալ տպավորություն է ստեղծվում, որ ընտրողները քվեաթերթիկի երկրորդ էջում պարտադիր պետք է ընտրեն այն քաղաքական ուժի տարածքային ընտրացուցակի թեկնածուներից մեկին, որին նախընտրում են:
NEWS.am-ի թղթակցի հարցին՝ քաղաքացիների գլխում հոլովակը խառնաշփոթ չի՞ ստեղծում, Տիգրան Մուկուչյանը պատասխանեց. «Կարծում եմ՝ ոչ: Դա ավելի շուտ վերաբերում է ընտրությունների արդյունքների հետ կապված թեմային: Դրա համար մեկ ժամանոց հոլովակ էր պետք: Այս հոլովակը, որպես այդպիսին, արդեն մեծ է՝ 4 րոպե տեւողություն ունի: Իսկ կոնկրետ այդ դրվագի հետ կապված ենթադրում եմ, որ ավելի կարճ հոլովակներ կլինեն, որոնում մենք գործընթացն ավելի մանրամասն կբացատրենք: Կարծում եմ, որ մենք կհասցնենք նաեւ հոլովակներ նկարահանել, որոնք մանրամասները կներկայացնեն: Այսինքն՝ մենք չենք սահմանափակվի միայն այս հոլովակով»:
Նշենք, որ Հայաստանի Ընտրական օրենսգրքի 67-րդ հոդվածի 3-րդ կետում հստակ նշված է, որ տարածքային ընտրական ցուցակից որեւէ մեկին ընտրելու ցանկության «դեպքում» ընտրողը նշում է նրա ազգանվան դիմաց: Մինչդեռ հոլովակում օգտագործված է «ընտրելու համար…» արտահայտությունը, որը, շատերի կարծիքով, սխալ տպավորություն է ստեղծում նաեւ այդ ընտրությունը կատարելու անհրաժեշտության մասին: Սակայն ձայնը այս կամ այն քաղաքական ուժին տալու համար բավական է քվեաթերթիկը պարզապես ծրարի մեջ դնելը՝ նրա վրա ոչ մի նշում չկատարելով եւ չծալելով, եւ քվեատուփ գցելը: