Գյումրիի պետական մանկավարժական համալսարանի նախկին ռեկտոր Վարդեւան Գրիգորյանը, ով առաջիններից էր, որ Գագիկ Ծառուկյանի քաղաքականությունից հեռանալուց հետո լքեց կուսակցությունը, այսօր չի բացառում, որ կվերադառնա։
Ժամանակին Վարդեւան Գրիգորյանը հիմնավորեց, թե ԲՀԿ-ն լքելով սատարում է իր ընկեր Ծառուկյանին։ Թե Ծառուկյանի քաղաքականություն վերադառնալու հայտարարությունից հետո ինչ է պատրաստվում անել, նա մանրամասնել է NEWS.am-ի հետ զրույցում։
Պարոն Գրիգորյան, Ծառուկյանի վերադարձը ի՞նչ իրավիճակ է ստեղծել այն մարդկանց համար, որոնք նրա քաղաքականությունից հեռանալուց հետո լքեցին կուսակցությունը։ Դուք առաջիններից էիք, որ հեռացաք։ Հիմա վերադառնալո՞ւ եք կուսակցություն։
Գիտեք, այն ժամանակ ես հայտարարեցի, որ Ծառուկյանը ոչ միայն իմ ղեկավարն է, այլ իմ ընկերը, եւ դա էր պատճառը, որ նաեւ ինչ-որ տեղ հրաժարվեցի կուսակցական գործունեությունից, դուրս եկա կուսակցությունից։ Հիմա վերադարձել է, չգիտեմ՝ ինչ առաջարկություններ կլինեն, միայն առաջարկություններից հետո կարող եմ որոշում կայացնել։ Որոշակի գործառույթներ կան, որպեսզի ստանձնի կուսակցության ղեկավարությունը, հատկապես որ հայտարարեց՝ լայն դաշինքով են մտնելու, դռները բաց են, եթե ցանկություն կա մասնակցելու, այսինքն՝ որոշակի գործառույթներից հետո նոր լիարժեք որոշում կկայացվի՝ ինչ անենք։
Դուք ուզո՞ւմ եք կրկին դառնալ ԲՀԿ-ական։
Ո՞նց կարող եմ այսօր հայտարարություն անել, իհարկե, կլինեն հանդիպումներ քննարկումներ եւ դրա արդյուքնում որոշում կկայացվի։ Այսօր չեմ կարող որոշում կայացնել ու ասել՝ կուսակցության անդամ կդառնամ եւ այլն։
Կարծիքներ կան, որ Սերժ Սարգսյանն է որոշել, որ Ծառուկյանը քաղաքական ինչ-ինչ նկատառումներից ելնելով՝ վերադառնա քաղաքական դաշտ եւ մասնակցի 2017 թվականի ընտրություններին։
Ես էդպիսի ինֆորմացիայի չեմ տիրապետում, չեմ կարող այդ հարցին պատասխանել։
Ի՞նչ ակնկալիքներ ունեք ընտրողից՝ հաշվի առնելով, որ վերջին երեք տարում Գագիկ Ծառուկյանը նախ իշխանափոխություն պահանջող «եռյակում» էր, հետո 2015-ին լքեց քաղաքականությունը, երկու տարի անց կրկին վերադարձել է։ Չե՞ք կարծում, որ մարդկանց մոտ հիասթափություն, անվստահություն կա ԲՀԿ-ի նկատմամբ։
Կուսակցության անդամների ու ժողովրդի մոտ, կարծում եմ, անվստահություն չի եղել, որովհետեւ Ծառուկյանը էն քաղաքական գործիչը չի եղել, որ դուրս գալուց հետո ստվերում մնար։ Ինքը նորից զբաղվել է բարեգործությամբ, ժողովրդի կողքին էեղել։ Դրանք չափորոշիչներ են, որոնց շնորհիվ նրա պահանջարկը ժողովրդի շրջանում, հասարակության մեջ կա։ Էդ շերտի համար երբեւիցե ինքը չի կորցրել վստահո՝ւթյունը։
Գյումրիի քաղաքապետի ընտրություններին Դուք ԲՀԿ-ի թեկնածուն էիք, հնարավո՞ր է՝ ԲՀԿ Գյումրիի տարածքային ցուցակով առաջադրեք Ձեր թեկնածությունը։
Թե որ ցուցակում են ինձ տեսնում՝ տարածքային, թե համամասնական, քննարկման արդյունքում կորոշվի։ Ես դեռ չգիտեմ, ոչինչ չեմ կարող ասել։