Արցախի սահմանին զինվոր է զոհվել: Հակառակորդի արձակած կրակոցից մահացու հրազենային վիրավորում է ստացել 19-ամյա Անդրանիկ Սմբատի Մուսիկյանը: Նա Գեղարքունիքի մարզի Գեղհովիտ գյուղից էր, ընտանիքի կրտսեր որդին, իրենից ավագ երկու եղբայր ունի:
Անդրանիկը 5 ամիս անց զորացրվելու էր: Արցախի նախագահի հրամանագրով Մուսիկյանը հետմահու պարգեւատրվել է «Մարտական ծառայություն» մեդալով։
Ադրբեջանի զինված ուժերը հունվարին միտումնավոր են գնդակոծել սահմանամերձ Չինարի գյուղը: Սա են փաստում Հայաստանի մարդու իրավունքների պաշտպանի գրասենյակի փաստահավաք աշխատանքների արդյունքները: Դրանք վկայում են, որ հակառակորդի գնդակոծման թիրախում են եղել քաղաքացիական օբյեկտները, այդ թվում՝ տները, մանկապարտեզի եւ դպրոցի շենքերը: Արման Թաթոյանը փաստում է. գյուղի մոտակայքում զորամասեր չկան, ինչով ադրբեջանական կողմը, թերեւս, կկարողանար «բացատրել» իր ագրեսիան:
Հաջորդ շաբաթ օմբուդսմենը Ստրասբուրգ է մեկնելու: Եվրախորհրդի բարձրաստիճան պաշտոնյաներին ներկայացնելու է կատարված ամբողջ աշխատանքը՝ փաստերով: Գնահատականների եւ արձագանքի առումով որոշակի ակնկալիքներ ունի, բայց այդ մասին հիմա խոսելը կոռեկտ չի համարում:
Նախագահը համոզված է, որ մարդկության բոլոր չարիքների արմատը տգիտության մեջ է, եւ ուզում է, որ մեր երկրում այդ չարիքը վերանա: Կրթության նախարարի հետ հանդիպմանը Սերժ Սարգսյանն ընդունել է, որ հանրակրթության ոլորտում, այո՛, տեսանելի, հաճախ նաեւ ոգեւորիչ ձեռքբերումներ կան, բայց դա չի նշանակում, որ բոլոր խնդիրները լուծված են: Նախագահին չի բավարարում նաեւ ուսուցիչների վերապատրաստման գործընթացը. այն ամբողջությամբ պետք է փոխվի:
Սերժ Սարգսյանի ցանկությունն է նաեւ, որպեսզի տեսանելի ապագայում Հայաստանում ունենանք բարձրագույն ուսումնական հաստատություններ, որոնք տեղ կգրավեն աշխարհի բուհական քարտեզի վրա: Այդ նպատակով նախարարին հանձնարարել է մասնագիտական խումբ ձեւավորել: Այն վեց ամիս ժամանակ է ունենալու՝ բարձրագույն մասնագիտական կրթության համակարգի բարեփոխումների հիմնադրույթներ ներկայացնելու համար:
Նախագահին այսուհետ խորհուրդներ կտա նաեւ նախկին գլխավոր դատախազը: Գեւորգ Կոստանյանը Սերժ Սարգսյանի խորհրդական է նշանակվել: Հայաստանի գլխավոր դատախազի պաշտոնից Կոստանյանը հրաժարական է տվել անցյալ տարվա հուլիսին, պաշտոնական հաղորդագրության համաձայն՝ առողջական խնդիրների պատճառով: Հրաժարականից կարճ ժամանակ անց մամուլում լուրեր հրապարակվեցին, որ նա նշանակվելու է Վրաստանում Հայաստանի դեսպանի պաշտոնում՝ փոխարինելով Յուրի Վարդանյանին:
Երեւանում այսօր մեկնարկել ու կարճ ժամանակ անց ավարտվել է ճանաչված լեզվաբան Փառանձեմ Մեյթիխանյանի ամուսնու դաժան սպանության գործով դատավարությունը: Նիստերի դահլիճը բազմամարդ է եղել, ամբաստանյալների հարազատներից ու ընկերներից շատերը ստիպված են եղել կանգնած հետեւել նիստի մեկնարկին: Այն, սակայն, ամբաստանյալներից երկուսի պաշտպանների չներկայանալու պատճառով հետաձգվել է: Հիշեցնենք, որ 58-ամյա Եղիշե Խաչատրյանին Նուբարաշենի խճուղում դաժանաբար ծեծելով սպանելու մեջ 5 երիտասարդ է մեղադրվում:
Բռնաբարության փորձ Կապանի բուժհաստատությունում: Շրջանառվող տեղեկությունների համաձայն՝ նախօրեին անեսթեզիոլոգը փորձել է բռնաբարել 19-ամյա հիվանդին: Մեր թղթակցի հետ զրույցում բուժկենտրոնից տեղեկացրել են, որ լսել են նման բան, բայց չեն կարող վստահաբար հաստատել: Բժշկուհիներից մեկն էլ նշել է, որ քննություն է կատարվում, բայց մանրամասներ չի կարող հայտնել: Հիվանդանոցում նաեւ խուսափում են նշել բուժաշխատողի անունը, սակայն, ըստ տեղեկությունների, խոսքը 53-ամյա անեսթեզիոլոգ Անուշավան Կարապետյանի մասին է: Նա Երեւանից է, Կապանի բուժկենտրոնում աշխատում է պայմանագրային հիմունքներով:
Երեւանի շենքերից մեկի 12-րդ հարկի բնակարանից 34-ամյա տղամարդ է ցած նետվել: Այդ մասին ոստիկանությանն ահազանգել է ինքնասպանություն գործածի եղբայրը:
Նա Իջեւանի բնակիչ Դավիթ Մելքումյանն է, «ՏԱՎՈՒՇ» նախագիծ ընկերության տնօրենը: Մելքումյանն ամուսնացած էր: Երկու երեխա ունի, շուտով երրորդ զավակն էր լույս աշխարհ գալու: Նախնական տվյալներով՝ նա Երեւան էր եկել նախօրեին, բժշկական հետազոտման ենթարկվելու նպատակով: Նա ցած է նետվել եղբորը պատկանող բնակարանի հյուրասենյակի պատուհանից: Քրեական գործ է հարուցվել:
Խոշոր վթար Երեւան-Մեղրի ավտոճանապարհին: Զոդի կամրջի մոտ իրար են բախվել «ՎԱԶ-2106» եւ «Mercedes» մակնիշի մեքենաները: Վթարի հետեւանքով 6 քաղաքացի է տուժել, այդ թվում՝ 3 անչափահաս: Տուժածներից 5-ին, այդ թվում՝ 3 տարեկան երեխայի, տարբեր մարմնական վնասվածքներով Երեւան են տեղափոխել:
Հունիսին Արցախում ծանր վիրավորված Ալբերտ Դալլաքյանը նորից տառերն է սովորում: Երիտասարդի հիշողությունը դեռեւս չի վերականգնվել, նա շատ նյարդային է, անընդհատ գլխացավեր է ունենում: Ալբերտը գարնան վերջին գլխի պլաստիկ վիրահատության կենթարկվի: Զինծառայողը գլխի շրջանում վիրավորում է ստացել հունիսի 24-ին: Դեպքից հետո պարզվել է. ավագ լեյտենանտ Ավագ Նահապետյանն է կրակել: Նրան մեղադրանք է առաջադրվել: Հավելենք, որ Ալբերտ Դալլաքյանը բռնցքամարտիկ է: Նա Ռուսաստանից վերադարձել էր՝ հատուկ Արցախում ծառայելու համար: Որդու վիրավորվելուց հետո ծնողները նույնպես Երեւան են վերադարձել:
Բողոքելու հերթը հասավ «Փոքր Մհեր»-ի ուսուցչական կազմին: Դժգոհում են. Մոնթե Մելքոնյանի անվան ռազմական վարժարանում դասերն արդեն սկսվել են, բայց «Փոքր Մհեր»-ի ուսուցիչներից ոչ մեկին չեն կանչել աշխատանքի: Կրթահամալիրի ֆիզիկայի ուսուցիչ Մանվել Ալեքսանյանն ասում է՝ իրենց խաբեցին, գործազուրկ են մնացել, իսկ «Փոքր Մհեր»-ի սաների մի մասն այդպես էլ չի գնացել վարժարան: Ուսուցիչների մոտ տպավորություն է, որ «Մոնթե Մելքոնյան» վարժարանին միայն կրթահամալիրի բյուջեն ու աշակերտներն էին պետք: Ավելի վաղ «Փոքր Մհեր»-ի ավագ մասնաճյուղի սաները, ծնողներն ու ուսուցիչները միավորման դեմ բողոքել էին պաշտպանության եւ կրթության նախարարներին:
Հունվարի 18-ին դոլարն ու եվրոն շարունակել են թանկանալ, ֆունտը մոտեցել է 600 դրամի սահմանին: Արդյունքում դոլարի փոխարժեքն այսօր կազմել է 486 դրամ, եվրոյինը՝ 520, ռուբլունը՝ 8 դրամ 22 լումա, ֆունտինը՝ 599 դրամ:
Հունվարի 19-ին հանրապետության շրջանների մեծ մասում թույլ ձյուն է սպասվում: Օդի ջերմաստիճանը 4-5 աստիճանով կբարձրանա: Երեւանում նույնպես վաղը թույլ ձյուն է սպասվում: Մայրաքաղաքում գիշերը կդիտվի -10-12, իսկ վաղը ցերեկը՝ -7-9 աստիճան ցուրտ:
