ԵԱՀԿ-ի գնահատականով՝ ԱՄՆ ընտրական համակարգը ծայրաստիճան ապաինտեգրված է ու շատ կետերով չի համապատասխանում միջազգային չափանիշներին։ Այս մասին հայտնել է ԵԱՀԿ Ժողովրդավարական կառույցների ու մարդու իրավունքների հարցերով բյուրոյի տնօրեն Միխայել Լինքը ՝ գերմանական Funke մեդիախմբի պարբերականներին տված հարցազրույցում։
Մասնավորապես, յուրաքանչյուր նահանգում տարբեր են ընտրական օրենսդրությունները ու նոր տեխնոլոգիաների գործածման փորձը, իսկ շատ նահանգներում նախկին ու դեռ իրենց պատիժը կրող բանտարկյալները առհասարակ զրկված են ընտրական իրավունքից։
Հաշվետվության մեջ, որը ընտրությունների արդյունքներով պատրաստել էր ԵԱՀԿ դիտորդների թիմը, նշվում է նաեւ ընտրարշավի ֆինանսական համակարգն ավելի թափանցիկ դարձնելու անհրաժեշտության մասին։
Բացի դրանից, ընտրությունների էլեկտրոնային համակարգի անվտանգությունն ապահովելու բոլոր փորձերով հանդերձ՝ գործածվել են բազմաթիվ հին համակարգիչներ, որոնք միջազգային չափանիշերին չեն համապատասխանում։
Լինքը նաեւ քննադատել է ԱՄՆ ընտրված նախագահ Դոնալդ Թրամփին այն բանի համար, որ նա «գիտակցաբար ու բազմիցս հատել է ատելության հռետորաբանության սահմանը»։ «Այն, որ նա դրանով հանդերձ կարողացել է հաջողության հասնել, վտանգավոր նախադեպ է ստեղծում,- շեշտել է Ժողովրդավարական կառույցների ու մարդու իրավունքների հարցերով բյուրոյի ղեկավարը,- Միջազգային համայնքը ակնկալում է, որ Միացյալ նահանգները այդ ոլորտում օրինակելի կլինի»։
