Պաշտպանության նախկին նախարար Սեյրան Օհանյանին Երկրապահ կամավորական միությունից հեռացնելու հարց չի քննարկվել: NEWS.am-ի հետ զրույցում ասել է ԵԿՄ մամուլի խոսնակ Վարդան Վարդանյանը:
«Նման հարց չկա, չի քննարկվել եւ առհասարակ, չկա նախադեպ, որ քաղաքական հայացքների համար որեւէ մեկին հեռացրել են Երկրապահ կամավորականների միությունից»,-ասել է Վարդան Վարդանյանը:
Նա նշեց, որ հնարավոր է, որ մի քանի ԵԿՄ-ականներ առաջադրվեն տարածքային ցուցակներով:
Հիշեցնենք, որ այսօր` հունվարի 19-ին, «Ժամանակ» թերթը գրել էր, որ չի բացառվում,որ որ ԵԿՄ-ն քննարկի՝ պաշտպանության նախկին նախարար Սեյրան Օհանյանին ԵԿՄ-ից հեռացնելու հարցը։ ԵԿՄ ղեկավարությունը՝ ի դեմս գեներալ Մանվել Գրիգորյանի, համարում է, որ իրենց շարքերում չի կարող լինել մեկը, ով կարող է դեմ գնալ իշխանություններին՝ անձամբ Սերժ Սարգսյանին, կամ խոսել, քննադատել իշխանություններին հակառակ ճամբարից։
Օրերս ԱԺ ՀՀԿ պատգամավոր, ԵԿՄ փոխնախագահ Սեյրան Սարոյանը եւս իր հարցազրույցներից մեկում ասել էր, որ իր սիրտը ցավում է, որ Սեյրան Օհանյանը ընդդիմադիր է դարձել»: