Ախալցխայում վաճառվում է հայ մեծանուն նկարիչ Վարդգես Սուրենյանցի տունը:

Akhaltskha.net-ի փոխանցմամբ, տան սեփականատիրոջ խոսքերով Վարդգես Սուրենյանցի տունը ներկայումս պահպանել է իր նախկին տեսքը եւ նա դիտմամբ այն չի վերանորոգել ժամանակակից ձեւով, քանզի ինքը դեռ մտածում է, որ կգտնվեն մարդիկ, ովքեր կցանկանան գնել Վարդգես Սուրենյանցի տունը եւ կվերածեն այն թանգարանի:

Վարդգես Սուրենյանցի տունը ունի հինգ միջին չափերի սենյակներ եւ տան հետեւի մասում փոքրիկ պարտեզ: Տունը ներկայումս վաճառվում է 90 000 դոլարով:

Հիշեցնենք, որ 2009 թվականի օգոստոսի 1-ին Ախալցխայում նկարչի տան պատի վրա բացվեց հայ մեծանուն նկարիչ Վարդգես Սուրենյանցին նվիրված հուշաքարը:

Նկարչի 150-ամյակին նվիրված միջոցառումը եւ հուշաքարի բացման արարողությունը կազմակերպել էր հայաստանցի գործարար, ծնունդով ախալցխացի Սոս Սահակյանը:

Վարդգես Սուրենյանցը ծնվել է 1860 թվականին Ախալցխայում, հոգեւորականի ընտանիքում։ Նախնական կրթություն ստացել է Լազարյան ճեմարանում, այնուհետ շարունակել ուսումը Մոսկվայի մեծ հեղինակություն ունեցող գեղանկարչության, քանդակագործության եւ ճարտարապետության ուսումնարանի ճարտարապետության բաժնում։ Իբրեւ նկարիչ ձեւավորվել է Մյունխենի կայսերական ակադեմիայում։

Տիրապետելով տասը լեզուների՝ Սուրենյանցը ուսումնասիրել է տարբեր ազգերի արվեստն ու գրականությունը։ Ժամանակակիցների վկայությամբ նա պարսկերեն Հաֆեզ ու Խայամ էր արտասանում, անգլերենից Վիլյամ Շեքսպիր ու Օսկար Ուայլդ թարգմանում, իտալերեներով զեկուցումներ կարդում, գրում գերմաներեն գրքերի առաջաբաններ, հայոց լեզվի բոլոր բարբառներով զրուցում թուրքական ջարդերից փախած գաղթականների հետ, ռուսերենով կատակում իր բարեկամ Իլյա Ռեպինի հետ։ Մյունխենից վերադառնալուց հետո Սուրենյանցը մասնակցել է դեպի Պարսկաստան կազմակերպված գիտարշավին։

Սուրենյանցը ապրել եւ ստեղծագործել է օտար երկնքի տակ, բայց իր ամբողջ էությամբ եւ հոգու ամեն մի թելով կապված է եղել հարազատ ժողովրդին, եղել նրա բախտակիցը, հույզերի ու խոհերի թարգմանը։