10 տարվա ընթացքում Իրանի հետ սահմանին ազատ տնտեսական գոտում ակնկալվում է 100-120 ընկերություն եւ 350-400 մլն դոլար ներդրումներ ներգրավել։ Այս մասին հունվարի 19-ին՝ լրագրողների հետ հանդիպմանը, ասել է ՀՀ Տնտեսական զարգացման եւ ներդրումների նախարարության Ներդրումային քաղաքականության վարչության ներդրումային ծրագրերի բաժնի պետ Արամ Վարդանյանը։
Նրա խոսքով՝ ակնկալվում է, որ այդ ընկերությունները Հայաստանից արտահանումը կմեծացնեն տարեկան 100-120 մլն դոլարով եւ հիմնականում ԵՏՄ երկրներ, Իրան, Մերձավոր Արեւելք, Միջին Ասիա։ Ակնկալվում է, որ դա կբացի 2500 աշխատատեղ։ Ազատ գոտին կտարածվի Իրանի հետ սահմանին՝ 35 հա տարածքով։ Ենթադրաբար 10 տարում կազմակերպչի ծախսերը կկազմեն 32 մլն դոլար, իսկ եկամուտը՝ 52 մլն։
Հենց սահմանից այն կողմ՝ իրանական կողմում, գործում է ազատ տնտեսական գոտի, որի հետ պլանավորվում է ամենասերտ համագործակցություն հաստատել։ Բանակցություններն արդեն ընթանում են։ Հայաստանում 2014-2016թթ. երկու ազատ տնտեսական գոտիներում արդեն 15 ընկերություն է գործում, որոնք պատրաստվում են 182 մլն դոլար ներդնել եւ 590 նոր աշխատատեղ ստեղծել։
