Իրանը եւ Հայաստանը կարող են համաձայնվել ազատ գոտիներում համատեղ շահավետ արտադրության շուրջ: Այս մասին հունվարի 19-ին լրագրողների հետ հանդիպման ժամանակ հայտարարեց տնտեսական զարգացման եւ ներդրումների փոխնախարար Հովհաննես Ազիզյանը՝ Իրանի սահմանին, Արաքս գետի ափին ազատ տնտեսական գոտի բացելու կառավարության ծրագրերը ներկայացնելիս:
Իրանում արդեն քանի տարի է ազատ տնտեսական գոտի է գործում Ադրբեջանի (Նախիջեւան) եւ Հայաստանի սահմանին:
Ազիզյանի խոսքով՝ կողմերը կարող են բաժանել ապրանքների արտադրական շրջափուլերը: Եթե դրանք նախատեսված են ԵՏՄ արտահանելու համար, ապա իրանական կողմում կարելի է կիսաֆաբրիկատներ արտադրել, իսկ հայկական՝ պատրաստի արտադրանքներ: Այդ դեպքում իրանական բիզնեսը կարող է հեշտությամբ Եվրասիական միություն արտահանվել:
Մասնավորապես՝ իրանական դեղագործական ընկերություններից մեկը հետաքրքրվում է եվրասիական շուկա արտահանելու համար Հայաստանում դեղամիջոցների փաթեթավորման կազմակերպմամբ՝ հատկապես հաշվի առնելով, որ 2017-ի հունվարի 1-ից ԵՏՄ-ի դեղերի շուկան ընդհանուր է դարձել:
