Դանիայի խորհրդարանում Հայոց ցեղասպանությունը դատապարտող բանաձեւի քննարկման մասնակիցներից ոչ մեկը չէր հերքում Ցեղասպանության փաստը։ Այս մասին NEWS.am-ի թղթակցի հետ զրույցում նշել է Դանիայում բնակվող ակտիվիստ Անահիտ Կարապետյանը։
Պատգամավորներից շատերը, սակայն, նշում էին, թե քաղաքական գործիչները չպետք է գնահատական տան այդ իրադարձություններին, որ պետք է հարցը թողնել պատմաբաններին։ «Բանաձեւը ներկայացնողները փաստում էին, որ պատմաբանները արդեն տվել են համապատասխան գնահատականները»,- նշել է Անահիտ Կարապետյանը։
Նրա համոմզամբ, այստեղ մեկ այլ խնդիր կա։ «Դանիայում նշում են Ողջակիզման զոհերի հիշատակի օրը։ Ինչո՞ւ կարելի է ընդունել Հոլոքոստը, իսկ Ցեղասպանություն ընդհանրապես պետք չէ քննարկել։ Այս հարցին որոշ պատգամավորներ փորձում էին չպատասխանել»,- պատմեց Անահիտ Կարապետյանը։
Քննարկման ընթացքում, նրա խոսքով, հնչեց նաեւ բանաձեւի նախագծի տեքստից «ցեղասպանություն» բառը եւ քննարկել Թուրքիայում խոսքի եւ մամուլի ազատության հարցերը։ «Այսինքն փորձ արվեց Հայկական հարցը օգտագործելով, ավելի շուտ քննադատել Էրդողանի քաղաքականությունը։ Մեզ համար ավելի շահեկան է, որ բանաձեւը այդ տարբերակով ընդհանրապես չընդունվի, քանի որ այն ենթարկվել է փոփոխությունների եւ այժմ Հայկական հարցի հետ ոչ մի առնչություն չունի»,- շեշտեց ակտիվիստը։
Բանաձեւի շուրջ քվեարկությունը Դանիայի խորհրդարանում կայանալու է հունվարի 26-ին։ Հուսով եմ, բանաձեւը այդ տեսքով չի ընդունվի, քանի որ հնչում էին առաջարկներ հանել «ցեղասպանություն» եւ «դատապարտում» բառերը։ Ելույթ ունեցող բոլոր պատգամավորները օգտագործում էին «ցեղասպանություն» եզրույթը եւ նշում, թե այցելել են Հայաստան եւ Թուրքիա ու գիտեն, որ Ցեղասպանություն եղել է։ Սարսափելին հենց դա էր, որ ոչ ոք չէր հերքում Ցեղասպանության փաստը»,- եզրափակեց Անահիտ Կարապետյանը։
Հիշեցնենք, որ հունվարի 19-ին Դանիայի խորհրդարանում քննարկվել է Հայոց ցեղասպանությունը դատապարտող բանաձեւի նախագիծը, որ ներկայացրել էին «Alternativet» եւ «Enhedslisten» կուսակցությունները։ Բանաձեւի հեղինակներն են պատգամավորներ Նիկոլայ Վիլումսենը եւ Ռասմուս Նորքվիստը։