Ամերիկացի եւ իռլանդացի գիտնականները համաշխարհային օվկիանոսի մակարդակի աղետալի բարձրացումը հնարավոր են համարում առաջիկա՝ ըստ երկրաբանական չափումների մի քանի հարյուր կամ հազար տարի ժամանակում: Համապատասխան հետազոտությունը հրապարակվել է Science ամսագրում, փոխանցում է EurekAlert!-ը:
Մասնագետները ցույց են տվել, որ համաշխարհային օվկիանոսի մակերեւույթի ջերմաստիճանը վերջին խոշոր միջսառցային ժամանակաշրջանում, մոտ 116-129 հազար տարի առաջ, գրեթե համընկել է ժամանակակից ջերմաստիճանին: Դրա հետ մեկտեղ, գրեթե այդ ժամանակաշրջանում ծովի մակարդակը 6-9 մետրով ավելի բարձր է եղել, քան հիմա:
Պարզվել է, որ միջսառցային ժամանակաշրջանի ամենասկզբում՝ մոտ 129 հազար տարի առաջ, համաշխարհային օվկիանոսի մակարդակը մոտ էր 1870-1889 թվականների նիշին:
Այնուհետեւ՝ մոտ 125 հազար տարի առաջ, ծովի մակերեւույթի միջին ջերմաստիճանը աճել է Ցելսիուսի մոտ 0,5 աստիճանով եւ գործնականում համեմատվել է ժամանակակից ցուցանիշին:
Գիտնականներն այս եզրակացությանն են եկել՝ համեմատելով միջսառցային ժամանակաշրջանում ջերմաստիճանի եւ համաշխարհային օվկիանոսի մակարդակի վերաբերյալ եղած տվյալները ժամանակակից ցուցանիշների հետ: Մասնագետները նշել են, որ հետազոտությունը կօգնի լավ հասկանալ այն, թե ծովն ինչպես է արձագանքում գլոբալ տաքացմանը: