Ռուսաստանի ԱԳ նախարար Սերգեյ Լավրովը փաստացի տեղը դրեց ադրբեջանական կողմին: Հունվարի 20-ին կայացած մամուլի ասուլիսում այս մասին հայտարարեց Հայաստանի ԱԳ նախկին փոխնախարար, արտակարգ եւ լիազոր դեսպան Արման Նավասարդյանը:
Անդրադառնալով ղարաբաղյան հիմնախնդրի շուրջ Լավրովի վերջին հայտարարությանը՝ նա նշեց, որ մոսկովյան դիվանագիտությունը միշտ ուժեղ պատասխան հարվածի հնարքն է կիրառում: «Ես դրական եմ գնահատում դա, քանի որ նման, կարելի է ասել, էմոցիոնալ հայտարարության տակ բավական լուրջ դիվանագիտական դեմարշ է թաքնված՝ նպատակ ունենալով ցույց տալ, որ ղարաբաղյան հիմնախնդիրը միջազգային հարց է, որով զբաղվում են համապատասխան կազմակերպությունները»,- ընդգծեց Նավասարդյանը:
Եվ վերջին շրջանում, ըստ նրա, հաշվի առնելով նաեւ ՀԱՊԿ նախկին գլխավոր քարտուղար Նիկոլայ Բորդյուժայի հայտարարությունը, կարծես փորձ է արվում սթափեցնել Ադրբեջանի նախագահ Իլհամ Ալիեւին, որն անցնում է «կարմիր գիծը» եւ բացարձակ չի ուզում խաղալ այն կանոններով, որոնք դրված են խնդրի լուծման հիմքում: Վիեննայի եւ Սանկտ Պետերբուրգի համաձայնությունները, Արման Նավասարդյանի խոսքով, չի կատարում ադրբեջանական կողմը՝ շեշտադրելով խնդրի ռազմական լուծումը:
2016 թվականի արդյունքներով կազմակերպված մամուլիսի ասուլիսում ՌԴ ԱԳ նախարար Սերգեյ Լավրովը, ի պատասխան ադրբեջանցի լրագրողի սադրիչ հարցին, հայտարարել էր, որ ղարաբաղյան հակամարտության կարգավորումը բացառապես Ադրբեջանի ներքին գործը չէ: