Հայաստանի ընտրատեղամասերում տեսախցիկներ տեղադրելու պատրաստ ընկերության պահանջած գումարը շատ ավելին է, քան նախատեսված էր այդ գործառույթի իրականացման համար։ Այս մասին հունվարի 20-ին լրագրողներին ասել է ԿԸՀ նախագահ Տիգրան Մուկուչյանը՝ անդրադառնալով խորհրդարանական ընտրությունների ժամանակ տեսախցիկներ տեղակայելու հարցին։
Նա հիշեցրեց, որ տեսախցիկներ տեղադրելու կապակցությամբ ստեղծվել է հանձնաժողով, որը մրցույթ է հայտարարել։ «Մրցույթին, որքանով մենք ենք տեղյակ, մասնակցել է միայն մեկ սուբյեկտ, որը եւ ներկայացրել իր պահանջները։ Դրանից հետո սկսվել են որոշակի քննարկումներ»,– նշեց Մուկուչյանը՝ հավելելով, որ հանձնաժողովը հունվարի 19-ին նիստ է հրավիրել, անցկացրել քննարկումներ, որոնց մասնակցել են նաեւ համապատասխան ընկերության ներկայացուցիչները։
«Եվ հարցը, ըստ էության, քննարկման փուլում է, քանի որ ակդ կազմակերպության պահանջած գումարը շատ ավելի է, քան նախատեսված է այդ գործառույթների համար։ Հիմա, բնականաբար, քննարկվում են կազմակերպչական այլ տարբերակներ։ Թե ինչպիսին կլինեն արդյունքները, այդ մասին հանձնաժողովը հետագայում լիարժեք տեղեկություն կներկայացնի»,– ասաց Տիգրան Մուկուչյանը։
