Գեւորգ Սաֆարյանի գործով դատարանի վճիռը հերթական անգամ ընդգծեց Հայաստանի Հանրապետությունում դատաիրավական համակարգի քաղաքականացված լինելու եւ խղճի բանտարկյալներ ունենալու փաստը: Այս մասին հայտարարություն են տարածել 4 հասարակական կազմակերպություններ:
Հայտարարությունում ասվում է.
«Շուրջ մեկ տարի տեւած դատավարությունից հետո՝ 2017թ. հունվարի 16-ին, «Նոր Հայաստան» քաղաքական միավորման անդամ Գեւորգ Սաֆարյանը դատապարտվեց երկու տարվա ազատազրկման: Նա եւ այլ ակտիվիստներ 2015թ. դեկտեմբերի 31-ի գիշերը փորձել էին Երեւանի Ազատության հրապարակում տոնածառ տեղադրել, ինչին ոստիկանները կոպտորեն խոչընդոտել էին եւ չորս հոգու բերման ենթարկել 2016թ.հունվարի 1-ի գիշերը: Նրանց մեջ էր նաեւ Գեւորգ Սաֆարյանը, սակայն ի տարբերություն մյուս երեք քաղաքացիների, Գեւորգ Սաֆարյանին ձերբակալել էին, նրան մեղադրանք էր առաջադրվել ՀՀ քրեական օրենսգրքի 316-րդ հոդվածի 1-ին մասով՝ ոստիկանության ներկայացուցչի նկատմամբ բռնություն գործադրելը:
Գեւորգ Սաֆարյանի գործով դատարանի վճիռը հերթական անգամ ընդգծեց Հայաստանի Հանրապետությունում դատաիրավական համակարգի քաղաքականացված լինելու եւ խղճի բանտարկյալներ ունենալու փաստը: Հաշվի առնելով այն, որ Գեւորգ Սաֆարյանը աչքի էր ընկնում անարդարության դեմ իր պայքարով, մշտապես ակտիվ մասնակցություն էր ունենում տարբեր հավաքների եւ իշխանությունների հասցեին հնչեցնում էր սուր քննադատություններ, կանխատեսելի էր դատավճռի բովանդակային մասը, որը հրապարակվեց դատավոր Մնացական Մարտիրոսյանի կողմից, ով հայտնի է հանրության շրջանում որպես քաղաքական եւ քաղաքացիական հայացքներ ունեցող անձանց նկատմամբ առավել խիստ պատիժներ նշանակելով:
Տարվա սկզբում կայացված դատավճիռը վկայում է, որ առաջիկա ընտրություններից առաջ իշխանություններն այս կերպ իրենց դիրքորոշումն են ներկայացնում քաղաքացիական ակտիվիստների կողմից երկրում իրական ժողովրդավարության հաստատման փորձերի դեմ:
Մենք՝ ներքոստորագրյալ հասարակական կազմակերպությունները, Գեւորգ Սաֆարյանի նկատմամբ դատավճիռը գնահատում ենք հաշվեհարդար նրա՝ իշխանության հասցեին արված սուր քննադատության համար, Գեւորգ Սաֆարյանին համարում ենք խղճի բանտարկյալեւ պահանջում նրան անհապաղ ազատ արձակել»:
Հայաստանի հելսինկյան կոմիտե իրավապաշտպան ՀԿ
Հելսինկյան քաղաքացիական ասամբլեայի Վանաձորի գրասենյակ
Բաց հասարակության հիմնադրամներ-Հայաստան
Ժուռնալիստների «Ասպարեզ» ակումբ
