Հայաստանում խորհրդարանական ընտրություններն արդեն նշանակվել են ապրիլի 2-ին։ ԿԸՀ–ն, համաձայն Ընտրական օրենսգրքի պահանջների, պետք է կազմակերպի ընտրական գործընթացները, իսկ մնացած գործառույթները ԿԸՀ լիազորությունների մեջ չեն մտնում։ Այս մասին հունվարի 20-ին լրագրողներին ասել է ԿԸՀ նախագահ Տիգրան Մուկուչյանը՝ անդրադառնալով ընտրությունները 2016-ին ղարաբաղյան հակամարտության գոտում ապրիլյան քառօրյա պատերազմի սկսվելու օրը նշանակելու բարոյական կողմին։
Մուկուչյանը նշեց, որ ընտրությունների անցկացման օրվա կապակցությամբ ցանկացած այլ դատողություն, առավել եւս բարոյական հարթակում, ըստ էության, ԿԸՀ իրավասության առարկան չէ։ «Հարցը բարձրացվում է ԸՕ համապատասխան իրավական դրույթների եւ ՀՀ Սահմանադրության առանձին դրույթների հիման վրա, սակայն նորից եւ նորից պետք է հաշվի առնել մի բան. կա Ընտրական օրենսգիրք, եւ նշանակվել է օր՝ համաձայն այդ օրենսգրքի։ Ինչ վերաբերվում է ԸՕ–ի կառուցվածքային խնդիրներին, ապա դրանք հարցեր են, որոնք ԿԸՀ իրավասությունների առարկան չեն»,– ասաց նա։
NEWS.am–ի հարցին ի պատասխան, թե ԸՕ–ն նախատեսում է արդյոք ընտրությունների օրը ապրիլի 1-10–ը նշանակել, եւ բացակայում էր արդյոք ապրիլի 9-ին նշանակելու հնարավորությունը, Մուկուչյանն ասաց. «Նշանակված է ընտրությունների օր, դա արդեն տվել է ԿԸՀ աշխատանքի մեկնարկը։ Մնացած գործառույթները ԿԸՀ իրավասություններից դուրս են»։
