Հասարակությունը ընտրություններից ոչ թե ակնկալիքներ պետք է ունենա, այլ՝ պահանջներ։ Այս մասին այսօր՝ հունվարի 20-ին, լրագրողների հետ հանդիպմանն ասաց Հ. Թումանյանի անվան Տիկնիկային թատրոնի գեղարվեստական ղեկավար Ռուբեն Բաբայանը։

Նա նշեց, որ պատասխանատու իշխանություն ձեւավորելու համար հասարակությունը պետք է ինքը պատասխանատու մոտեցում ցուցաբերի ընտրություների հանդեպ. «Ընտրությունը ոչ թե լավ կամ վատ իշխանություն ընտրելու համար է, այլ պատասխանատվության համար է՝ այս երկրի, ժողովրդի ապագայի, քո անձնական ապագայի վերաբերյալ։ Մենք կեղծում ենք, վաճառում ենք, ինչ-որ ուրիշ բաներ ենք անում ընտրելու փոխարեն, մենք հրաժարվում ենք պատասխանատվությունից, առաջին հերթին։ Անպատասխանատու հասարակությունը չի կարող ունենալ պատասխանատու պետություն։ Կարծում եմ, որ իշխանությունը եւ կուսակցությունն են հանրությանը սպասարկող մեխանիզմները, այլ ոչ թե հակառակը»,-ասաց նա։

Այդ պատճառով, Բաբայանի կարծիքով՝ հասարակությունը պետք է կարողանա իր հստակ պահանջները ձեւավորել եւ ներկայացնել քաղաքական ուժերին։

«Ես կարծում եմ, որ հասարակությունը որեւէ սպասելիք եւ ակնկալիք պետք է չունենա, այլ պետք է իր պահանջները ներկայացնի իշխանությանը։ Իսկ եթե սպասեն, թե՝ արի, մեզ կերակրի, ուրեմն էս վիճակը մշտապես շարունակվելու է։ Մենք՝ որպես հասարակություն, գոնե հասարակության որոշակի խավեր, պիտի կարողանանք ձեւակերպել մեր պահանջները քաղաքական կուսակցություններից։ Քաղաքական կուսակցություններն ընտրություններից առաջ զբաղվելու են պոպուլիզմով: Մենք պետք է տարբերենք պոպուլիզմը իրականությունից, չէ՞ որ խոստումներն իրագործելը հնարավորություններից են կախված, այլ ոչ թե բարի կամքից»,- մեկնաբանեց Տիկնիկային թատրոնի ղեկավարը։

Ասուլիսին ներկա Երեւանի գրողների միության նախագահ Աբգար Ափինյանն իր հերթին նշեց, որ ընտրություններին լինելու է այն, ինչին կսպասի հասարակությունը. «Հստակ կարող եմ ասել՝ ինչ կցանկանանք, այն էլ ունենալու ենք ընտրություններին. ուզում ենք տեսնել սկանդալներ, սկանդալներ կլինեն, ուզում ենք տեսնել դատափետում, փոխադարձ հայհոյանք, դա էլ կլինի։ Ես, լինելով լավատես մարդ, ուրիշ բան եմ ցանկանում. ամեն ինչ կանեմ, որ տեսնեմ գաղափարական տարբեր ծրագրերի առաջադրում, փոխադարձ հարգանքի մթնոլորտ»։

Նրա կարծիքով՝ խորհրդարանում մտավորականների ներկայությունն անհրաժեշտություն է, քանի որ կան բազմաթիվ հարցեր, որոնք վերաբերում են տարբեր ոլորտներին, եւ դրանց մասնագետների ներկայությունը խորհրդարանում կնպաստի գործին։

«Ես կարծում եմ, որ ապագա խորհրդարանում պետք է լինեն տաղանդավոր պատմաբաններ, գիտնականներ, որովհետեւ քաղաքական գործիչները այն չափով իրազեկ չեն արվեստի, գիտության խնդիրներին, որքան մեր մտավորականները։ Ապագա պառլամենտի կեսը թող լինեն մտավորականներ։ Տասական թվականներին Օսմանյան պառլամենտի լավագույն պատգամավորը Գրիգոր Զոհրապն էր»,- ասաց Աբգար Ափինյանը։

Այս խոսքին հակադարձեց Ռուբեն Բաբայանը. «Եթե հայ ժողովրդի ճակատագրով զբաղվեին քաղաքական գործիչները, այլ ոչ թե գրողները, գուցե 100 տարի առաջ ճակատագիրը ուրիշ ձեւով դասավորվեր։

Մտավորականները թող իրանց գործով զբաղվեն, ի՞նչ գործ ունեն պառլամենտում, օրենք գրելու հետ ես ի՞նչ գործ ունեմ»։