Արմավիրի մարզի ընդհանուր իրավասության դատարանում դեկտեմբերիին փաստաբան Գեորգի Մելիքյանի վրա հարձակված դատախազ Կորյուն Ներսիսյանը, որը կաթողիկոս Գարեգին Բ-ի եղբորորդին է, այսօր` հունվարի 20-ին, դատարանի որոշմամբ հեռացվեց գործի վարույթից:

Դատավոր Ադամյանը, քննության առնելով դատախազի դեմ Մելիքյանի կողմից ներկայացված բացարկի միջնորդությունը, որոշեց այն բավարարել եւ դատախազ Կ.Ներսիսյանին հեռացնել գործի վարույթից։

NEWS.am-ի տեղեկություններով, այսօրվա դատական նիստին Գեորգի Մելիքյանին աջակցելու համար ներկա են եղել մի խումբ փաստաբաններ։

Հիշեցնենք, որ դեկտեմբերի 13-ին փաստաբան Գեորգի Մելիքյանը հայտնել էր փաստաբանների պալատին, որ դատավոր Ադամյանի վարույթում գտնվող գործի քննության ընթացքում, նույն գործով հանդես եկող դատախազ Կ. Ներսիսյանը, փաստաբանի կողմից իր մասնագիտական գործողությունների կապակցությամբ վրդովվել է, եւ հարձակվել փաստաբանի վրա, վիրավորել, դատական նիստերի դահլիճի խոսափողը շպրտել փաստաբանի ուղղությամբ, որից հետո փաստաբանին հրավիրել է դուրս՝ հարցերը պարզաբանելու համար:

Մեր տեղեկություններով, դատախազը 34-ամյա Կորյուն Ներսիսյանն է՝ Արմավիրի մարզի Ոսկեհատ գյուղից։ Դատախազը կաթողիկոս Գարեգին Բ-ի եղբորորդին է։