Արդարադատության նախարարության քրեակատարողական վարչության հանրային կապերի բաժինը պարզաբանում է ներկայացրել ՄԻԵԴ-ում Վահան Շիրխանյանի շահերը պաշտպանող փաստաբանի այն հայտարարության մասին, որ իրեն թույլ չեն տվել տեսակցել նրա հետ:
«Ձերբակալված եւ կալանավորված անձանց պահելու մասին» Հայաստանի Հանրապետության օրենքի 15-րդ հոդվածի 2-րդ մասի համաձայն` կալանավորված անձի միջնորդության հիման վրա, քրեական վարույթն իրականացնող մարմնի որոշմամբ` նրան թույլատրվում են նաեւ առանձին, անարգել տեսակցություններ քրեական գործով պաշտպան չհանդիսացող փաստաբանի հետ՝ առանց տեսակցությունների թվի եւ տեւողության սահմանափակման, եթե դա կապված է կալանավորված անձին քրեական գործի քննության հետ չկապված իրավաբանական օգնություն ցույց տալու անհրաժեշտության հետ։ Քրեական վարույթն իրականացնող մարմնի կողմից նշված միջնորդության քննարկումը եւ լուծումը, ինչպես նաեւ կալանավորված անձի կողմից դրա կապակցությամբ կայացված որոշման բողոքարկումն իրականացվում են Հայաստանի Հանրապետության քրեական դատավարության օրենսգրքով սահմանված կարգով։
Ձերբակալված կամ կալանավորված անձի տեսակցությունը փաստաբանի կամ պաշտպանի հետ տրամադրվում է այն դեպքում, երբ փաստաբանը կամ պաշտպանը ներկայացնում է անձը հաստատող փաստաթուղթ եւ փաստաբանական գործունեության արտոնագիր կամ փաստաբանի վկայական՝ քրեական վարույթն իրականացնող մարմնի կողմից ձերբակալվածներին կամ կալանավորվածներին պահելու վայրի վարչակազմին ուղղված համապատասխան հավաստագրի հիման վրա:
Ընդ որում, որպես Վ. Շիրխանյանի փաստաբան ներկայացած անձը չի ներկայացրել նաեւ իր անձը եւ լիազորությունները հաստատող, վերը նշված իրավադրույթով սահմանված փաստաթղթերը:
Այսպիսով, պաշտպան չհանդիսացող փաստաբանի հետ տեսակցության թույլտվության վերաբերյալ որոշում կայացնող մարմինը ոչ թե քրեակատարողական հիմնարկն է, այլ վարույթն իրականացնող մարմինը, հետեւաբար որպես ՄԻԵԴ-ում Վ. Շիրխանյանի պաշտպան ներկայացած անձին Վ. Շիրխանյանի հետ տեսակցության մերժումը իրավաչափ է եւ բխում է «Ձերբակալված եւ կալանավորված անձանց պահելու մասին» Հայաստանի Հանրապետության օրենքի 15-րդ հոդվածի պահանջներից: