Խորհրդարանական ընտրություններին ընտրատեղամասերում տեսախցիկներ տեղադրելու մրցույթին հայտ ներկայացրած ընկերության՝ «Ի ԱՅ ՍԻ Տելեկոմ»-ի եւ տեսախցիկների տեղադրման հարցով ստեղծված հանձնաժողովի միջեւ քննարկումները շարունակվում են, դեռեւս հստակ որոշում չկա։ Այս մասին NEWS.am-ի հետ զրույցում ասել է Կառավարության աշխատակազմի ղեկավար-նախարար Դավիթ Հարությունյանը:
«Հանձնաժողովը երկու տարբերակ ունի՝ կամ չեղարկել մրցույթը, փոխել պահանջները, համեստ պահանջներով հանդես գալ կամ բանակցել ընկերության հետ, հանգել եզրակացության, թե 1 միլոն 600 հազար եվրոյով ինչ կարելի է անել։ Կառավարությունն այդ ուղղությամբ գումար չի հատկացրել եւ չի էլ նախատեսել, միշտ նախատեսվել է, որ գումարը դրա համար հատկացնելու է Եվրամիությունը»,- նշեց Դավիթ Հարությունյանը։
Դավիթ Հարությունյանի խոսքով՝ միջազգային դոնոր կազմակերպություններին ֆինանսական միջոցների հարցով կարող է դիմել միայն հանձնաժողովը, որտեղ որոշումները կայացվում են կոնսենսուսով։ Նշենք, որ հանձնաժողովի չորս անդամը իշխանության ներկայացուցիչ են, չորսը՝այլ ուժերի։
Տեսախցիկների տեղադրման հարցով միջկուսակցական հանձնաժողովի ղեկավար, դաշնակցական Համլետ Աբրահամյանը մեզ հետ զրույցում ասաց, որ այսօր նույնպես քննարկել են հարցը, ներկայացրել առաջարկներ, որոնք ընկերությունը կարողանա իրականացնել առկա 1 միլիոն 600 հազար եվրոյի սահմաններում, սակայն դեռ որեւէ եզրահանգման չեն եկել։
Հիշեցնենք, որ մրցույթին մասնակցելու հայտ է ներկայացրել միայն մեկ ընկերություն, որը տեսախցիկների տեղադրման համար առաջարկել է 3 միլիոն 8 հարյուր հազար եվրո, մինչդեռ Եվրամիությունը Հայաստանին տրամադրել է 1 միլիոն 600 հազար եվրո։