Դերասան Հայկ Մարությանը կողմնակից է բոլոր այն նախաձեռնություններին, որոնք կարող են վերացնել երկրում միակողմանի կառավարումը։ Լրագրողների հետ զրույցում դերասանը, որը նույնպես ներկա էր «Ելք» դաշինքի համագումարին, նշեց, որ ինքը հատուկ «Ելք» դաշինքի կողմնակից չէ, այլ պատրաստ է աջակցել բոլոր ուժերին, որոնք անկախ են։
«Այս դաշինքում շատ լավ ընկերներ ունեմ, ստացել եմ հրավեր, բնականաբար ընդունել եմ, ողջունում եմ ցանկացած նախաձեռնություն, որը մեր ապագա ԱԺ–ն կբերի բալանսի, այսինքն՝ չլինի մի կուսակցության որոշում, այլ որոշումները կախված լինեն մի քանի ուժերից։ Միայն այդ դեպքում ԱԺ–ն կարող է ժողովրդանպաստ որոշումներ կայացնել։
Իմ կարծիքով՝ այս դաշինքն այն դաշինքներից է, որը կարող է նեյտրալիզացնել այդ որոշումները։ Եթե կան ուժեր, ոնոնք նույնպես հրամանով չեն գործում, ես կողմնակից եմ բոլոր այդ ուժերին»,–ասաց նա։
Նա ավելացրեց, որ ոչ մի կուսակցության չի անդամակցի. «Ես ոչ մի կուսակցության չեմ անդամակցում, դա ինձ հնարավորություն է տալիս ավելի անաչառ լինել եւ քաղաքացիների տեսանկյունից դիտել ամեն ինչին»։
Լրագրողի հարցին, թե կուսակցության անդամ չլինելով՝ ամեն դեպքում կարո՞ղ է առաջադրվել կուսակցությունների ցուցակում, Հայկ Մարությանը նշեց, որ չի բացառվում։
«Առայժմ ցուցակում լինելու նպատակներ չունեմ, եթե ես զգամ, որ ԱԺ–ում ավելի շատ բան կարող եմ անել, քան ԱԺ–ից դուրս, բնականաբար, որոշումս այդպիսին կարող է լինել»,– ասաց նա։
Դերասանն ասաց, որ մշտապես ժողովրդի կողմը լինելուց եւ ոչ իշխանական միջոցառումներ նախաձեռնելուց եւ մասնակցելուց անհանգստություն չունի, որ կարող է խոչընդոտվել իր մասնագիտական աշխատանքը։
«Ստեղծագործական աշխատանքը հնարավոր չի խոչընդոտել, այսինքն պիտի իմ մտքերը ի՞նչ անեն, կարելի է ստեղծագործական աշխատանքը շարունակել հեռուստատեսությունից դուրս, բայց այդպիսի բան մինչ այժմ չեմ նկատել, չկան խոչընդոտներ, որովհետեւ իմաստ դրա մեջ չկա, երեւի։ Չլինես հեռուստատեսությունում, կարող ես թատրոնում ներկայացում տալ, չլինես թատրոնում, կարող ես կինո նկարել, չլինես կինոյում, կարող ես գնալ արտասահման, այնտեղ կինո նկարել եւ ցուցադրել այստեղ, այսինքն, իմ բախտից այնպիսի ոլորտ է, որտեղ հնարավորությունները շատ ավելի լայն են, քան ինչ–որ բան ներկրելը կամ չգիտեմ»,– ասաց նա։
Լրագրողի հարցին, թե դերասանի կարծիքով իշխանությունը չարի՞ք է դարձել երկրի համար, Հայկ Մարությանը պատասխանեց. «Այն, որ իշխանությունը Հայաստանը չի տանում լավ տեղ, դա հաստատ է, բայց չարիք է, թե չէ, չգիտեմ, երեւի»։
