Ղարաբաղի հարցը հնարավոր է լուծել հայանպաստ ու ճիշտ ճանապարհով, եթե Հայաստանը հզոր լինի, իսկ Հայաստանի ներսում՝ վստահության մթնոլորտ: Այդ մասին «Հանրապետություն» կուսակցության քաղխորհրդի նախագահ Արամ Սարգսյանն ասել է այսօր՝ հունվարի 21-ին «Ելք» դաշինքի համաժողովից հետո լրագրողների հետ կայացած զրույցում:
«Այս հարցը հավի ձվի պատմությունը դարձնել է, թե Սերգոն լավ կապրի, եթե Ղարաբաղի հարցը լուծվի, կամ Սերգոն լավ չի ապրի, եթե Ղարաբաղի հարցը չի լուծվել: Ղարաբաղի հարցը շատ կարեւոր է, բայց լավ ապրելու համար առաջին հերթին կարեւոր է արդարությունը: Նույնիսկ պատերազմի ժամանակ հացը հավասար են կիսել, մարդիկ հավասար կիսած հացով կռվել են ու հաղթել»,-ասաց նա:
Արամ Սարգսյանը նշեց, որ Հայաստանի երեք նախագահներն էլ խոսել են փոխզիջումներից եւ փորձել խաղաղության գնալ, բայց հարեւան երկիրը թշնամություն քարոզող է եւ նրա հետ փոխզիջման գնալը դժվար է:
«Անկախ իմ վերաբերմունքից, երեք նախագահներն էլ փորձել են խաղաղության գնալ եւ ինչ-որ տեղ հանրությանը խաղաղության պատրաստել են, չեն վախեցել բարձրաձայն ասել, որ պատրաստ են զիջումների: Հիմա նայենք հարեւան երկրին, խրախուսում են կացինով մարդ սպանողին, եթե այդ երկիրը թշնամության մթնոլորտում է, ո՞նց կարող ես այդ երկրի հետ գնալ փոխզիջման, զիջել տարածքներ»,-ասաց նա:
