Հայտնի բլոգեր Ալեքսանդր Լապշինի կալանավորումը եւ Մինսկից Ադրբեջան արտահանձնումը օրենքի հետ ոչ մի ընդհանություն չունի եւ բացառապես քաղաքական նպատակներ է հետապնդում: Այս մասին հայտարարվեց այսօր՝ հունվարի 21-ին, հայ փաստաբանների՝ Փաստաբանների պալատի նախագահ Արա Ղազարյանի եւ փաստաբան Սիմոն Բաբայանի մասնակցությամբ մամուլի ասուլիսի ժամանակ:
Հիշեցնենք, որ հունվարի 17-ին Բելառուսի գլխավոր դատախազի տեղակալ Ալեքսեյ Ստուկը Ալեքսանդր Լապշինի արտահանձնման մասին Ադրբեջանի հարցումը բավարարելու որոշում է ընդունել, որի մասին միայն 2 օր անց է հայտնի դարձել: Բելառուսի օրենսդրության համաձայն՝ որոշումը կարող է բողոքարկվել 10 օրվա ընթացքում, եւ Բելառուսի իշխանությունների գործողությունները վկայում են, որ նրանք ձգտում են Լապշինի փաստաբանին զրկել որոշումը բողոքարկելու հնարավորությունից:
Արա Ղազարյանի խոսքով՝ Ալեքսանդր Լապշինի դեմ գործի հիմքում խոսքի ազատության իրավունքն է: «Ադրբեջանն իր ավագ եղբոր՝ Թուրքիայի օրինակով քրեական օրենսդրությունը քաղաքական նպատակներով է օգտագործում»,- նշեց փաստաբանը:
Փաստաբան Սիմոն Բաբայանը նշեց, որ դատախազի որոշումը դեռեւս չի բողոքարկվել: Ընդհանուր առմամբ, Հայաստանը չի կարող որեւէ մասնակցություն ունենալ: Բայց կարող են մասնակցել Ռուսաստանի իրավաբանները եւ իրավապաշտպանները: Նա հիշեցրեց, որ Հայաստանի Փաստաբանների պալատում խումբ է ստեղծվել: Բելառուսի եւ Ռուսաստանի փաստաբանների պալատներին է ներկայացվել հայկական կողմի տեսակետը, պատասխան գործողություններ են սպասվում՝ ուղղված Ալեքսանդր Լապշինի պաշտպանությանը:
Փաստաբանների պալատի ներկայացուցիչների կարծիքով՝ Ալեքսանդր Լապշինի գործը կարող է վտանգավոր նախադեպ դառնալ ոչ միայն նրանց համար, ովքեր Լեռնային Ղարաբաղ են այցելում, այլեւ Ղրիմ, Հարավային Օսիա:
