Հայաստանի ժողովուրդը «Ելք» դաշինքի օգնությամբ հաղթելու իրական հնարավորություններ ունի: «Ելք» դաշինքի առաջին համագումարից հետո այս մասին NEWS.am-ի թղթակցի հետ զրույցում հայտարարեց «Քաղաքացիական պայմանագիր» կուսակցության վարչության անդամ, ԱԺ պատգամավոր Նիկոլ Փաշինյանը:
Հարցին, որ մամուլը գրում է ԲՀԿ նախկին առաջնորդ Գագիկ Ծառուկյանի՝ քաղաքականություն վերադարձից հետո դաշինքի համար ստեղծված շոկային իրավիճակի մասին, պատգամավորը պատասխանեց. «Կարծում եմ՝ մեր դաշինքը պատասխանել է Ձեր հարցին»:
Անդրադառնալով առաջիկա խորհրդարանական ընտրություններին դաշինքի հնարավորություններին՝ Նիկոլ Փաշինյանն ընդգծեց. «Ժողովուրդը «Ելք» դաշինքի հետ միասին հաղթելու իրական հնարավորություններ ունի»:
Խոսելով պաշտպանության նախկին նախարար Սեյրան Օհանյանի եւ ԱԳ նախկին նախարար Վարդան Օսկանյանի հետ հնարավոր միության մասին՝ նա նշեց. «Մենք արդեն դաշինք ենք ստեղծել»: Նա նաեւ հավելեց, որ նշված գործիչների հետ բանակցություններ չեն ընթանում:
Իսկ Րաֆֆի Հովհաննիսյանի եւ «Ժառանգություն» կուսակցության ներկայացուցիչների հետ, Փաշինյանի խոսքով, շարունակում են բանակցել. «Եվ հույս ունենք, որ կհաջողվի ընդհանուր հայտարարի գալ: Իրական հնարավորություն պետք է փնտրել հենց այստեղ՝ նկատի ունենալով ոչ միայն քաղաքական կոնյուկտուրան, այլ այն ուղին, որն անցել են «Ժառանգություն» կուսակցությունն ու «Ելք» դաշինքը: Իսկ ուղիները շատ հարցերում նման են»,- ընդգծեց Փաշինյանը:
