Մայիսի 31-ից կալանքի տակ գտնվող Ժիրայր Սեֆիլյանի հետ համագործակցությամբ ապօրինի զենք, զինամթերք պահելու մեջ մեղադրվող Ներսես Պողոսյանը 30 օր տեւած հացադուլից հետո առողջական խնդիրներ ունի: NEWS.am-ի հետ զրույցում նրա քույրը՝ Վարսիկը, նշեց, որ Ներսեսը սրտի, երիկմաների , ոտքերի եւ տեսողության հետ կապված առողջական խնդիրներ ունի:
«Երիմաները բորբոքվել են, ոտքերն ուռել են եւ տեսողությունն է վատացել: Ինքը սրտի հետ կապված խնդիր ուներ եւ չէր կարելի, որ այդքան երկար հացադուլի մեջ գտնվեր»,-ասաց նա:
Վարսիկը նշեց, որ Ներսես Պողոսյանի շահերի պաշտպան Արայիկ Պապիկյանը նրան տեսակցել է հունվարի 20-ին եւ հունվարի 23-ին պատրաստվում է դիմում ներկայացնել՝ նրան «Դատապարտյալների հիվանդանոց» ՔԿՀ տեղափոխելու համար:
«Այդ վիճակում նա երկար չի կարողանա մնալ խցում, երկուշաբթի պետք է դիմենք, որպեսզի տեղափոխեն «Դատապարտյալների հիվանդանոց»»:
Ավելի վաղ տեղեկացրել էիքն, որ Ներսես Պողոսյանը 30 օր տեւած հացադուլով պահանջում էր փոխել իր խափանման միջոց կալանքը, նա ամուսնացած է, երեք անչափահաս երեխա ունի:
Հիշեցնենք, որ Ներսես Պողոսյանը կալանավորվել է 2016 թվականի մայիսի 31-ին: Նրան մեղադրում են ՀՀ Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: Այս քրեական գործով նախաքննություն ավարտվել է, գործն ուղարկվել է դատարան:
