Շատերը սպասում էին, որ երդմնակալությունից հետո Դոնալդ Թրամփն ավելի լուրջ ու դրական մոտեցում կցուցաբերի երկրի միավորման հարցում, սակայն նրա ճառը հազիվ թե հանգստացրեց ամերիկացիներին: Այս մասին NEWS.am-ի հետ զրույցում ասաց քաղաքագետ, Տարածաշրջանային հետազոտությունների կենտրոնի տնօրեն Ռիչարդ Կիրակոսյանը:
Քաղաքագետի խոսքով՝ Թրամփի ճառը կարելի է որակել որպես «բացասական վրեժխնդրության եւ անձնական անբարյացակամության դրսեւորում»: Չնայած նախընտրական խոստումների եւ սպառնալիքների ավանդույթին՝ թեկնածուների մեծ մասը հետեւում են թողնում նախընտրական հռետորաբանության բլեֆն ու սնապարծությունը եւ արագ հարմարվում են նախագահական պրագմատիզմի գործնական պահանջներին: Սակայն, ինչպես նշեց Կիրակոսյանը, Թրամփն աչքի չի ընկնում ավանդական վարքով, եւ նրա անսովոր համոզմունքներն ընկած էին իր ռազմավարության հիմքում, որի նպատակն էր հաղթել ընտրություններում:
«Ավելին՝ Թրամփի արշավի հռետորաբանությունը շատ անկանխատեսելի է, եթե չասենք՝ անպատասխանատու: Այն փաստացի թեկնածուին ծառայեց որպես քաղաքական ակտիվ՝ օգնելով հաղթահարել դժվարությունները ինչպես հիմնական հանրապետական մրցակիցների, այնպես էլ Հիլարի Քլինթոնի դեմ պայքարում: Այսպիսով՝ նորմալ կյանքի եւ հասուն կառավարման վերադառնալու բոլոր ակնկալիքներն անտեղի են»,- ասաց Կիրակոսյանը՝ հավելելով, որ դա վերաբերում է նաեւ արտաքին քաղաքականությանը: