Ղարաբաղա-ադրբեջանական շփման գծում խաղաղապահ ուժեր տեղակայելու շուրջ բանակցություններ չեն ընթանում եւ երբեք այդպիսի բանակցություններ չեն եղել: Այդ մասին երեկ՝ հունվարի 20-ին Դիլիջանում զորացրված զինծառայողների հետ հանդիպմանն ասել է Հայաստանի նախագահ Սերժ Սարգսյանը:
Նախագահը նշել է, թե ղարաբաղյան խնդրի հանգուցալուծումից հետո խաղաղապահ ուժեր ի վերջո տեղակայվելու են, դա միանշանակ է:
Զինծառայողներից մեկի հարցին, թե ապրիլյան պատերազմի ժամանակ Ադրբեջանը տարածքային աճ է ունեցել, արդյոք ժամանակը չէ պատժելու, Սարգսյանը պատասխանել է. «Ես երբեք չեմ եղել այն տեսակետի կողմնակիցը, որ մենք կարող են Ադրբեջանին կապիտուլյացիա պարտադրել: Ժամանակից աշխարհում ռազմական գործողություններ սկսել եւ այլ երկրի տարածքներ գրավել եւ ասել՝ սա իմն է, կարող են անել միայն պետությունները, որոնք աշխարհում եղանակ են ստեղծում, որոնք տասնյակ անգամ գերազանցում են իրենց հակառակորդին:
Ենթադրենք, մենք ձեռնարկեցինք ռազմական օպերացիա, գրավեցինք եւս երկու-երեք շրջան: Հետո ի՞նչ է լինելու արդյունքում: Ադրբեջանցիները հանձնվելո՞ւ են: Եթե դու այլ բան նկատի ունես, դա, իհարկե, եւս տարբերակ է: Նկատի ունեմ, որ երբ նրանք սկսում են ռազմական գործողություններ մենք ոչ միայն պաշտպանվենք, այլ նաեւ գործողություններ նախաձեռնենք: Դա տարբերակ է, եւ այդ տարբերակը մշտապես մեր կողմից դիտարկվում է: Բայց մեզ համար ընդունելին այն է, որ կարողանանք Լեռնային Ղարաբաղի խնդիրը լուծել, վերջնական կարգավիճակ տալ»:
Սերժ Սարգսյանը խոսել է նաեւ«Ազգ-բանակ» գաղափարախոսության մասին, նշելով. «Մենք Ղարաբաղում ազգ-բանակ էինք, որովհետեւ վտանգը մեծ էր: Մեր ժողովուրդն ամեն ինչ արեց, որ մենք չկորցնենք Ղարաբաղը, պաշտպանենք մենք սահմանները, եւ փառք Աստծո, կարողացանք անել: Մեծ գին վճարեցինք, բայց կարողացանք մեզ պաշտպանել, իսկ ամենակարեւորը դա է: Ազգ-բանակի մասնիկները պարտադիր չէ, որ լինեն միայն Հայաստանում Ազգ-բանակի անդամներ են բոլոր նրանք, ովքեր, ապրելով Միացյալ նահանգներում, Ռուսաստանում կամ Արգենտինայում, համակված են այդ գաղափարով»:
