Մասնագիտական պարտականությունները ոչ պատշաճ կատարելու համար 2,5 տարվա ազատազրկման դատապարտված, Գյումրիի բժշկական կենտրոնի ռադիոլոգ Նազանի Մալխասյանի փաստաբանը համաձայն չէ Վերաքննիչ քրեական դատարանի կայացրած որոշման հետ, որով անփոփոխ է թողնվել առաջին ատյանի կայացրած դատավճիռը:
«Հայաստանյան դատարաններն անում են այն, ինչ դատախազությունն է գրում, կարելի ա ասել՝ դարձել են կնիք դնող»,- NEWS.am-ի հետ զրույցում ասաց Մալխասյանի փաստաբան Իշխան Վանոյանը:
Փաստաբանը հայտնեց, որ պատրաստվում է վճռաբեկ բողոք ներկայացնել:
Նշենք, որ բժշկուհու փաստաբան Իշխան Վանոյանը Վերաքննիչ էր դիմել եւ պահանջում էր կայացնել արդարացման դատավճիռ կամ ուղարկել ստորադաս դատարան` նոր քննության: Դատարանը, սակայն, մերժել էր բողոքը:
Հիշեցնենք, որ ըստ մեղադրական եզրակացության՝ ռադիոլոգ Նազանի Մալխասյանն իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով այդ պարտականությունները կատարել է ոչ պատշաճ, ինչի հետեւանքով անզգուշությամբ առաջացրել է բուժվող հիվանդ Լեւոն Դարբինյանի մահը:
Նազանի Մալխասյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: Խափանման միջոց է ընտրվել ստորագրություն չհեռանալու մասին: