«Հայկական վերածնունդ» կուսակցությունն առաջիկա խորհրդարանական ընտրություններին, ամենայն հավանականությամբ, միայնակ է մասնակցելու (ֆոտոռեպորտաժ): Այս մասին այսօր՝ հունվարի 22-ին, «Հայկական վերածնունդ» կուսակցության կանանց միության համագումարից հետո լրագրողների հետ զրույցում ասաց կուսակցության նախագահ Արթուր Բաղդասարյանը:
«Մենք բովանդակության մեջ արդեն իսկ որոշակի դաշինք ենք, այնպես որ ընտրություններին ամենայն հավանականությամբ միայնակ ենք մասնակցելու: Ամեն դեպքում մեր դռները դեռեւս բաց են, քաղաքական կոնսուլտացիաներ են տեղի ունենում, տեսնենք՝ ինչպիսին կլինի վերջին հանգրվանը, փետրվարի 11-ին համագումար է լինելու, որի ժամանակ վերջնական դիրքորոշումը կհայտնենք»,- ասաց նա:
Թե կոնկրետ ում հետ են կոնսուլտացիաներ տեղի ունենում, Արթուր Բաղդասարյանը հրաժարվեց փակագծերը բացել՝ նշելով, որ պայմանավորվածություն կա երկուստեք գաղտնիությունն ապահովելու. «Միայն նշեմ, որ կան քաղաքական ուժեր, որոնք ցանկություն ունեն մեզ հետ մասնակցել առաջիկա քաղաքական գործընթացներին, մենք ավարտական փուլում ենք գտնվում այն կոնսուլտացիաների»:
Հարցին՝ ում հետ է բացառվում համագործակցությունը, կուսակցության նախագահը կրկին հրաժարվեց անուններ նշել: