ԱՄՆ-ի իշխանությունները հետաքննություն են սկսել Yahoo! ընկերության դեմ: Քննիչները կասկածում են, որ ընկերությունը կարող էր իր ներդրողներին երկու խոշոր արտահոսքի մասին ավելի արագ զգուշացնել, քան դա արել է: Այս մասին հայտնում է The Wall Street Journal-ը՝ վկայակոչելով իրավիճակին ծանոթ աղբյուրին:

ԱՄՆ-ի արժեթղթերի եւ բորսաների հանձնաժողովը հետաքննություն է սկսել եւ դեկտեմբերին ընկերությունից փաստաթղթեր է խնդրել: Հանձնաժողովը ցանկանում է պարզել՝  ընկերությունը քիբերհարձակումների մասին տեղեկությունները հրապարակելիս արդյո՞ք հետեւել է քաղաքացիական օրենսդրությանը: Հանձնաժողովն ընկերությունից պահանջում է քիբերհարձակումների մասին հայտարարել, երբ որոշվում է, որ այն կարող է ազդել ներդրողների վրա:

Հետաքննությունը վերաբերում է 2014-ին Yahoo!-ի արտահոսքին, երբ հափշտակվել էին 500 մլն օգտատերերի տվյալներ, որոնք պարունակում էին նրանց անունները, էլեկտրոնային փոստի հասցեները, ծածկագրերը, հեռախոսահամարները եւ անձնական այլ տեղեկություններ: Yahoo!-ն այս արտահոսքի մասին հայտարարել է 2016-ի սեպտեմբերին՝ մինչ օրս չպարզաբանելով, թե ինչու է դրա համար 2 տարի պահանջվել: