«Համախմբում», «Երրորդ հանրապետություն» եւ Հայաստանի Դեմոկրատական կուսակցությունների դաշինքի նախընտրական համամասնական ցուցակը, ամենայն հավանականությամբ, կգլխավորի պաշտպանության նախկին նախարար Սեյրան Օհանյանը: Այս մասին NEWS.am-ի թղթակցի հետ զրույցում հայտարարեց Դեմկուսի նախագահ Արամ Սարգսյանը: Նրա խոսքով, սակայն, դաշինքում միավորված կուսակցություններն այս հարցով վերջնական որոշում դեռեւս չեն կայացրել:
Անդրադառնալով ապրիլի 2-ի խորհրդարանական ընտրություններին ԲՀԿ նախկին առաջնորդի «Գագիկ Ծառուկյան» դաշինքի հետ համատեղ մասնակցելու հնարավարությանը՝ Սարգսյանը նշեց. «Չեմ կարող հիմա պատասխանել այդ հարցին, քանի որ հարկավոր է հասկանլ, թե ինչ նպատակներ ու ծրագրեր է մտադիր իրականացնել այդ դաշինքը: Մենք արդեն հստակ հայտարարել ենք մեր սկզբունքների մասին: Առայժմ չգիտեմ, թե ինչ սկզբունքներ եւ կարգախոսներ կառաջադրի այդ դաշինքը: Մենք առայժմ չենք քննարկել նման հնարավորությունը»:
«Համախմբումը», «Երրորդ հանրապետությունն» ու Դեմկուսն առայժմ չեն քննարկել նաեւ իրենց նախընտրական դաշինքի անվանումը: «Կարող եմ ասել, որ հունվարի 27-ին մենք անցկացնելոեւ ենք Հայաստանի Դեմոկրատական կուսակցության 8-րդ համագումարը: Մեր կարգախոսն է՝ «Հանուն արդարության եւ համերաշխության»»,- հավելեց Արամ Սարգսյանը:
Հիշեցնենք, որ Հայաստանի նախկին ԱԳ նախարար Վարդան Օկանյանի գլխավորած «Համախմբում», ՀՀ նախագահի աշխատակազմի ղեկավարի նախկին տեղակալ Վիկտոր Դալլաքյանի «Երրորդ հանրապետություն» եւ Արամ Սարգսյանի գլխավորած Հայաստանի Դեմոկրատական կուսակցությունները հունվարի 17-ին հայտարարեցինմ որ առաջիկա խորհրդարանական ընտրություններին մասնակցելու են միասնական դաշինքով: