«Ելք» դաշինքը կհաղթահարի անցողիկ շեմը՝ Հայաստանի խորհրդարանում տեղ ունենալու համար: NEWS.am-ի թղթակցի հետ զրույցում այս մասին հայտարարեց Կովկասի ինստիտուտի փոխտնօրեն, քաղաքագետ Սերգեյ Մինասյանը:
Անդրադառնալով «Ելք» դաշինքի (Էդմոն Մարուքյանի «Լուսավոր Հայաստան», Նիկոլ Փաշինյանի եւ Սասուն Միքայելյանի «Քաղաքացիական պայմանագիր», Արամ Սարգսյանի «Հանրապետություն» կուսակցություններ) եւ նախկին ԱԳ նախարար Վարդան Օսկանյանի, ԱԺ-ում նախագահի նախկին նեերկայացուցիչ Վիկտոր Դալլաքյանի եւ Դեմկուսի առաջնորդ Արամ Սարգսյանի դաշինքի նախընտրական հնարավորություններին՝ քաղաքագետը նշեց. «Քանի որ առաջին դաշինքը համեմատաբար նոր է, որոշակի նորույթ կա, նրանք որոշակի դրական իմիջ ունեն: Երկրորդ՝ նրանք փորձում են հանդես գալ, այսպես կոչված, արեւմտամետ ընդդիմության դերում, որը հայկական քաղաքական համակարգում գոյություն ունի 2003-2004 թվականներից: Այս ամենը հաշվի առնելով՝ կարծում եմ, որ նշված դաշինքն առնվազն կհաղթահարի խորհրդարանի նվազագույն անցողիկ շեմը»:
Ինչ վերաբերում է ստեղծվող երկրորդ դաշինքին, ըստ Մինասյանի՝ այս դեպքում իրավիճակը շատ ավելի բարդ է, քանի որ մի կողմից Վարդան Օսկանյանի եւ Սեյրան Օհանյանի պարագայում կարելի է խոսել՝ որպես միանգամայն փորձառու քաղաքական գործիչների մասին: «Մյուս կողմից՝ հենց այն գործոնը, որ նրանք այս կամ այն կերպ ներգրավված են եղել իշխանական համակարգում, եւ նրանց անվան հետ գործող իշխանությունների բազմաթիվ խնդիրներ են կապում, կարող է դաշինքի համար որոշակի խնդիրներ հարուցել»,- նշեց Սերգեյ Մինասյանը: