Lider TV-ի լրագրող Անար Հասանովը, որը հեռացվել է Լեռնային Ղարաբաղի վերաբերյալ Ռուսաստանի ԱԳ նախարար Սերգեյ Լավրովին տված հարցի համար, հայտարարություն է կատարել:
«Ազատություն» ռադիոկայանի հետ զրույցում լրագրողը հաստատել է, որ իրեն հեռացրել են, սակայն չի ցանկացել մանրամասներ ներկայացնել. «Այո, ես այլեւս Lider հեռուստաալիքում չեմ աշխատում: Ոչ մի այլ բան չեմ ցանկանում ասել»:
Նշենք, որ լրագրողին հեռացրել են Լավրովին տված հարցի համար՝ «Ինչպիսի՞ն կլինի Մոսկվայի դիրքորոշումը օկուպացված տարածքներում հակաահաբեկչական գործողություններ սկսելու եւ օկուպացիոն ուժերին ոչնչացնելու դեպքում, դրա վրա Մոսկվան աչքերը կփակի՞, թե՞ կմիջամտի Ադրբեջանի ներքին գործերին», ինչին ՌԴ ԱԳ նախարարը պատասխանել է. «Լեռնային Ղարաբաղի հակամարտության տեսակետից դա արդեն բացառապես Ադրբեջանի ներքին գործը չէ»: Ավելի վաղ հաղորդվել է, որ լրագրողի հեռացման հարցը պնդել է Ռուսաստանում Ադրբեջանի դեսպան Փոլադ Բյուլբյուլօղլին, որը կարծում է, որ լրագրողի հարցը եւ դրան Լավրովի պատասխանը վնաս է հասցրել երկրների բարեկամական հարաբերություններին:
