Երեւանում, հունվարի 22-ին, տեղի է ունեցել դրես-կոդի՝ հագուստի կանոնակարգի վերաբերյալ միջոցառում, որը նպատակ ուներ օգնել հայ երիտասարդ կանանց գործնական նորաձեւության աշխարհում իրենց դեգերումների ճանապարհին:
Միջոցառումը կազմակերպվել էր կանանց մենթորական ծրագրի շրջանակում, որն անցկացվում է ԱՄՆ դեսպանատան հովանու ներքո՝ Հայաստանի ամերիկյան համալսարանի Քաղաքագիտության եւ միջազգային հարաբերությունների բաժնի եւ Կանանց եւ երիտասարդների աջակցման եւ զարգացման կենտրոնի հետ համատեղ: Դրես-կոդին նվիրված միջոցառմանը, որին մասնակցում էին մենթորական ծրագրի այս տարվա շրջափուլի տասնյակ մասնակից մենթիներ, բացման խոսքով հանդես եկավ Լի Քարթերը՝ ՀՀ-ում ԱՄՆ դեսպան Ռիչարդ Միլսի կինը:
Այս միջոցառման հիմնական նպատակն էր մենթորական ծրագրի մասնակից երիտասարդ ուսանողուհիներին հաղորդակից դարձնել դրես-կոդի հիմնական կանոններին, օգնել ոճերի (casual, business/smart casual, cocktail) տարբերակման հարցում, որպեսզի ապագա մասնագետները գրագետ մոտենան հագուստի ընտրության հարցում թե´ հարցազրույցի գնալիս, թե´ աշխատավայրում եւ թե՛ զանազան այլ միջոցառումների ժամանակ: Միջոցառման ընթացքում մոդելները ներկայացան դրես կոդի տարբեր ոճերով, ինչպես նաեւ հայ դիզայներներ Լիլիթ Մարգարյանի, Արամ Նիկոլյանի, Լիաննա Սարգսյանի եւ Լիլիթ Մելիքյանի կոկտեյլային զգեստներով:
Միջոցառումը կազմակերպվել էր մենթորական ծրագրի այս տարվա մասնակից մենթորներ Գոհար Բաղդասարյանի (Հավանա ռեստորանային համալիրի տնօրեն), Կարինա Դնոյանի («Ատեքս» նորաձեւության կենտրոնի տնօրեն, հագուստի դիզայներ, ոճաբան), Հրանուշ Ռեստակյանի («Լեվրիմ եւ Վանիլա Քեյք» հրուշակագործական արտադրության տնօրեն) աջակցությամբ: Միջոցառմանը ներկա էին նաեւ ԱՄՆ փոխդեսպանի կինը՝ Ներմինե Մանսուրը եւ «Ատեքս» նորաձեւության կենտրոնի փոխտնօրեն, իմիջմեյկեր Օլգա Լավրիենկոն:
ՀՀ-ում ԱՄՆ դեսպանատունը եւ Հայաստանի ամերիկյան համալսարանը կանանց մենթորական ծրագրի իրականացումը սկսել են 2010թ.-ին: Մենթորները խորհուրդներ են տալիս կարիերայի վերաբերյալ, ներկայացնում են իրենց անձնական փորձը եւ օրինակ են ծառայում խոստումնալի երիտասարդ ուսանողուհիներին: Այս տարի 61 կին մենթորներ՝ տարբեր ոլորտների կայացած պրոֆեսիոնալներ, իրենց խորհուրդներով ուղղորդում են 62 մենթիների, ովքեր տարբեր բուհերի ուսանողուհիներ են, ինչպես նաեւ «Հուսո այգի» երիտասարդ կանանց բարեգործական հիմնադրամի եւ «Մեր տուն» կազմակերպության սաներ:
