1000 դոլար կաշառք պահանջելու եւ ստանալու մեջ մեղադրվող Շենգավիթ վարչական շրջանի ընդհանուր իրավասության նախկին դատավոր Իշխան Բարսեղյանը բերանի խոռոչի փոքր վիրահատության է ենթարկվել: Այս մասին այսօր` հունվարի 22-ին, լրագրողների հետ զրույցում ասաց նրա շահերի պաշտպան Վարդուհի Էլբակյանը: Նա նշեց, որ հունվարի 17-ին նա ենթարկվել է փոքր վիրահատության:
«Բերանի խոռոչի հետ կապված խնդիրներ ունի, ենթարկվել է փոքր վիրահատության, ամեն դեպքում հինգ կար է դրվել»,-ասաց նա:
Վարդուհի Էլբակյանը նշեց, որ դատաբժշկական փորձաքննություն կատարվել է, որի արդյունքը պաշտպանական կողմին չի բավարարում:
«Նրա մարմնական վնասվածքների չափը, վարույթն իրականացնող մարմնի որոշումը մեզ չի բավարարում, այս մասով աշխատում ենք եւ համապատասխան միջնորդությամբ հանդես կգանք»,-ասաց նա:
Նշենք, որ այսօր քրեական գործով դատական նիստը հետաձգվեց` ամբաստանյալ Իշխան Բարսեղյանի դատարան չներկայանալու հիմքով:
Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով՝ Կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ Կաշառքի միջնորդությունը: Իշխան Բարսեղյանի նկատմամբ մինչդատական վարույթում որպես խափանման միջոց ընտրվել էր կալանավորումը:
Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:
Կաշառք տալու պահը տեսագրվել է եւ տարածվել: