Ադրբեջանը, չբավարարվելով ԵԱՀԿ-ի բյուջեի արգելափակմամբ, ԵԱՀԿ Մինսկի խմբի դեմ ուղղակի դեմարշ է նախաձեռնել:
ԵԱՀԿ-ում Ադրբեջանի ներկայացուցչությունը հայտարարությամբ է հանդես եկել՝ ընդհանրապես ԵԱՀԿ-ին եւ մասնավորապես ԵԱՀԿ Մինսկի խմբին մեղադրելով եւ շանտաժի ենթարկելով:
«ՄԱԿ ԱԽ-ի հաստատած շրջանակներից ԵԱՀԿ-ի Մինսկի խմբի եւ համանախագահների դուրս գալը խախտում է իրենց ստացած մանդատը, որը կարող է լուրջ հետեւանքներ ունենալ հակամարտության կարգավորման գործընթացի վրա»,- նշված է հայտարարության մեջ, փոխանցում է trend.az-ը: Փաստաթղթի հեղինակների կարծիքով՝ «ԵԱՀԿ Մինսկի խմբի համանախագահները պետք է վերադառնան ՄԱԿ ԱԽ-ի իրենց հանձնարարված խնդիրների կատարմանը եւ երկու կողմերին ներգրավեն հակամարտության կարգավորման անկախ բանակցությունների մեջ»,- նշված է հայտարարության մեջ:
Ավելին՝ նրանք բացահայտ շանտաժի են ենթարկել ԵԱՀԿ ՄԽ-ի համանախագահող երկրներին՝ պնդելով, որ «եթե նրանք ի վիճակի չեն ադրբեջանական օկուպացված տարածքներից հանել Հայաստանի զինված ուժերին, դիմակայել խաղաղ կարգավորմանը սպառնացող բազմաթիվ մարտահրավերներին, Ադրբեջանն իրավունք ունի ցանկացած ճանապարհով պաշտպանելու իր հողերը եւ քաղաքացիներին»:
Առայժմ ԱՄՆ-ը, Ռուսաստանը եւ Ֆրանսիան այս սադրիչ հայտարարությանը չեն արձագանքել:
